Burime të sigurta nga organet e drejtësisë konfirmojnë se SPAK është vënë në lëvizje dhe ka hapur një hetim të gjerë që përfshin Ministren e Infrastrukturës dhe Energjisë, Belinda Balluku.
Sipas informacioneve, hetimi është përqendruar në dyshime për korrupsion, shpërdorim detyre dhe pastrim parash, që lidhen me tenderat dhe koncesionet e dhëna nga kjo ministri gjatë viteve të fundit.
Si pjesë e këtij hetimi, SPAK ka ushtruar kontrolle në banesat e disa zyrtarëve të afërt me Ballukun, përfshirë Sekretaren e Përgjithshme të Ministrisë, Viola Haxhiademi, dhe Drejtoreshën e Financave, Evis Mamaj.
Gjatë këtyre kontrolleve, janë sekuestruar telefonat personalë të të dyja zyrtareve, të cilat konsiderohen personat më të afërt dhe më të besuar të Ballukut në strukturën e ministrisë.
Burime pranë hetimit bëjnë me dije se SPAK po analizon komunikimet dhe korrespondencat e tyre, pasi dyshohet se përmes këtyre kontakteve mund të dokumentohen lidhjet e drejtpërdrejta midis zyrtarëve të ministrisë dhe kompanive të përfshira në tendera të dyshimtë.
Ky veprim i fortë i SPAK-ut vjen pas një sërë kallëzimesh dhe raportimesh publike që lidhin emrin e Belinda Ballukut me një rrjet kompanish që kanë përfituar kontrata publike me vlera qindra milionë euro, shpesh pa garë të ndershme apo me dokumente të falsifikuara.
Në fokus të hetimeve janë edhe koncesionet dhe PPP-të e dhëna nga Ministria e Infrastrukturës, të cilat përbëjnë rreth 75% të gjithë kontratave koncesionare në vend, me një vlerë që i afrohet 5 miliardë eurove.
SPAK dyshon se përmes një rrjeti të organizuar personash brenda ministrisë, janë manipuluar procedura, janë favorizuar kompani të caktuara dhe janë kryer transferime parash jashtë vendit, në destinacione si ShBA dhe Dubai.
Këto lëvizje hetimore tregojnë se rrethi po ngushtohet rreth Belinda Ballukut, e cila prej kohësh është përmendur në një sërë aferash me tendera dhe koncesione publike.
Burime pranë organit të akuzës theksojnë se SPAK po mbledh prova shtesë për të lidhur zinxhirin e komunikimeve mes Ballukut dhe bashkëpunëtorëve të saj të ngushtë në ministri.
Nëse këto dyshime provohen, hetimi ndaj Belinda Ballukut mund të shndërrohet në një nga dosjet më të rëndësishme antikorrupsion në historinë e fundit të Shqipërisë.
