Një helikopter i Marinës Amerikane dhe një avion luftarak janë rrëzuar të dielën mbi Detin e Kinës Jugore, brenda 30 minutash nga njëri-tjetri, gjatë operacioneve rutinë. Flota e Paqësorit konfirmoi se të gjithë anëtarët e ekuipazheve janë shpëtuar pa lëndime, ndërsa hetimet për shkaqet e incidenteve kanë filluar.
Helikopteri MH-60R Seahawk u rrëzua rreth orës 14:45 me orën lokale, gjatë operacioneve nga aeroplanmbajtësja USS Nimitz. Të tre anëtarët e ekuipazhit u nxorrën të sigurt nga ekipet e kërkim-shpëtimit. Pak më vonë, një avion luftarak F/A-18F Super Hornet po ashtu u rrëzua. Dy pilotët e këtij avioni arritën të katapultoheshin dhe u shpëtuan pa probleme. Ky është incidenti i katërt për avionë F/A-18 që humbën këtë vit, secili me një vlerë prej rreth 60 milionë dollarësh.
Deti i Kinës Jugore është një zonë me rëndësi strategjike për tregtinë ndërkombëtare, por gjithashtu është një nga rajonet më të kontestuara, me Kinën që pretendojnë pronësinë mbi shumicën e tij, pavarësisht gjykimeve ndërkombëtare që e kundërshtojnë këtë. Në dy dekadat e fundit, Kina ka forcuar pretendimet e saj duke ndërtuar baza në ishujt dhe shkëmbinjtë nënujorë të kontestuar, duke shkaktuar shqetësime për lirinë e lundrimit dhe tregtinë në këto ujra.
Forcat amerikane kanë një prani të qëndrueshme në rajon për të sfiduar pretendimet e Kinës dhe për të mbështetur aleatët e Uashingtonit në Azi. Ky incident ka ndodhur edhe në kuadër të turneut diplomatik të Presidentit Donald Trump në Azi, ku ai planifikon të takohet me udhëheqësin kinez Xi Jinping për bisedime mbi tregtinë.
Gjatë këtij viti, Marina Amerikane ka humbur dy avionë të tjerë F/A-18 në Dete të ndryshme, duke përfshirë një që u rrëzua pas ngritjes dhe një tjetër me defekte teknike. USS Nimitz, një nga aeroplanmbajtëset më të mëdha dhe më të vjetra në shërbim, pritet të dalë nga përdorimi vitin e ardhshëm.
