Gjatë natës së kaluar, reshjet e shumta të shiut kanë mbiferuar Qarkun Shkodër, duke shkaktuar vështirësi kryesisht në zonat malore të bashkive Pukë dhe Fushë Arrëz. Disa rrugë rurale janë bllokuar për shkak të rrëshqitjeve të dherave, dhe ka pasur ndërprerje të furnizimit me energji elektrike në disa fshatra. Strukturat vendore dhe ato të emergjencave civile janë angazhuar për pastrimin e rrugëve dhe për rikthimin e energjisë.
Situata në bashki:
-
Bashkia Shkodër: Reshjet e shiut kanë vazhduar gjatë gjithë natës, por deri tani nuk ka pasur raporte për situata kritike, përveç bllokimit të rrugës Kir–Shosh nga rënia e gurëve, e cila është aktualisht e pakalueshme. Strukturat përkatëse po punojnë për zhbllokimin e aksit.
-
Bashkia Malësi e Madhe: Një situatë normale raportohet, pa probleme të rëndësishme nga reshjet. Strukturat e emergjencave civile janë në gatishmëri dhe monitorojnë situatën.
-
Bashkia Vau Dejës: Asnjë problem i rëndësishëm nuk është raportuar si pasojë e reshjeve, dhe vijon verifikimi i banesave që janë dëmtuar më parë.
-
Bashkia Pukë: Disa rrugë rurale kanë pësuar dëmtim, kryesisht në Rrapë dhe Gjegjan, me bllokimin e rrugës nacionale Pukë–Fushë Arrëz për shkak të shembjes së një masivi dheu. Disa fshatra kanë pasur ndërprerje të furnizimit me energji elektrike, ndërsa strukturat po punojnë për pastrimin e rrugëve dhe rikthimin e energjisë.
-
Bashkia Fushë Arrëz: Reshjet e dendura kanë dëmtuar pothuajse të gjitha rrugët rurale dhe janë evidentuar rrëshqitje të masiveve të dheut. Probleme me energjinë elektrike janë raportuar në disa njësia, si dhe dëmtime të ujësjellësave. Aktualisht po punohet për hapjen e aksit Pukë–Fushë Arrëz.
Drejtoria e Ujitjes dhe Kullimit Lezhë ka raportuar rreth 40 mm reshje gjatë natës, por deri tani nuk ka pasur dëmtime të evidentuara në sistemet e kullimit, ndërsa nivelet e ujit në lumenjtë Buna dhe Drin janë brenda normave të zakonshme.
Reshjet kanë vijuar me intensitet mesatar deri të lartë në disa zona, por deri tani nuk janë raportuar problematika të mëdha përveç dëmtimeve të infrastrukturës në Pukë dhe Fushë Arrëz. Strukturat vendore dhe ato të emergjencave civile vazhdojnë të monitorojnë dhe intervenojnë në terren.
