Shërbimi Meteorologjik Ushtarak njoftoi se Shqipëria do të përballet sot me kushte atmosferike të paqëndrueshme. Moti parashikohet me vranësira dhe alternime kthjellimesh, sidomos në Ultësirën Perëndimore gjatë orëve të mesditës.
Në orët e para të ditës priten reshje të herëpashershme shiu me intensitet mesatar, përfshirë shtrëngata dhe shkarkesa elektrike në disa qarqe si Shkodër, Lezhë, Dibër, Tiranë, Durrës, Elbasan e Gjirokastër. Pjesa tjetër e territorit pritet të ketë reshje me intensitet më të ulët.
Gjatë mesditës, reshjet do të jenë të herëpashershme në veri dhe pjesërisht në qendër, me ndërprerje të përkohshme. Megjithatë, në orët e mbrëmjes, pritet një riaktivizim i reshjeve, që do të kenë intensitet mesatar dhe periudha të forta, kryesisht në zonën veriperëndimore dhe pjesërisht në qendër.
Era do të fryjë nga jugu me shpejtësi mesatare prej 8 m/s, por në vijën bregdetare dhe zonat luginore, shpejtësia pritet të arrijë deri në 18 m/s, duke shkaktuar dallgëzim në dete me forcën 3-4 ballë.
Këto kushte atmosferike të paqëndrueshme sugjerojnë kujdes, veçanërisht në zonat e prekura nga shtrëngatat dhe erërat e forta, ku është e rëndësishme të merren masa për të garantuar sigurinë e qytetarëve.
