Territori i qarkut të Kukësit është përballur me mot të keq, çka ka sjellë reshje të dendura shiu dhe mjegull të dendur në zonat e ulëta. Pasojat e këtyre kushteve atmosferike kanë ndikuar rëndë në rrugët rurale dhe nacionale, veçanërisht në segmentet si Kukës–Qafë Mali, Kukës–Bushtricë, dhe Kukës–Shishtavec, ku ka patur prezencë uji në sipërfaqe dhe rënie gurësh.
Rruga e Kombit nuk ka shpëtuar as ajo nga moti i keq; segmenti Kolsh–Tuneli i Kalimashit ka qenë i mbuluar nga mjegulla e dendur, duke vështirësuar qarkullimin. Rënie të gurëve janë regjistruar gjithashtu pranë daljes së fshatit Myç–Mamëz dhe afër divizionit ushtarak të Kukësit, duke detyruar shoferët të reduktojnë shpejtësinë për të evituar aksidentet.
Një tjetër problem është shkaktuar nga reshjet e pandërprera që kanë çuar në ndërprerjen e energjisë elektrike në disa zona malore. Sipas të dhënave zyrtare, reshjet kanë ndikuar edhe në rritjen e nivelit të ujit në Liqenin e Fierzës, i cili është rritur me rreth 30 centimetra në ditë, duke e çuar atë në një nivel kritik.
Autoritetet janë angazhuar në monitorimin e situatës në akset rrugore dhe në zonat me rrezikshmëri të shtuar, për t’u përgjigjur në rast emergjencash. Ndërkohë, qyteti i Kukësit ka përjetuar probleme të ngjashme, me përmbytje në dy segmente rrugore: njëri pranë Drejtorisë së Policisë dhe tjetri afër sheshit të Obeliskut, ku uji ka mbuluar rrugët dhe trotuaret.
Këto kushte atmosferike kanë krijuar vështirësi të mëdha për qarkullimin e automjeteve dhe kalimtarëve, duke e bërë të domosdoshëm kujdesin e shtuar gjatë lëvizjes. ndaj situatës edhe për t’u mbrojtur nga rreziqet e mundshme.
