Frika nga dentisti mbetet një sfidë për shumë njerëz, veçanërisht kur bëhet fjalë për zëvendësimin e dhëmbëve përmes procedurave kirurgjikale invazive dhe implantimit të vidave të titanit. Një proces që shpesh kërkon kohë të konsiderueshme për t’u realizuar. Megjithatë, shkencëtarët në King’s College London po eksplorojnë metoda inovative për të rritur ose implantuar dhëmbë biologjikë direkt në nofullën e njeriut.
Ana Angelova Volponi dhe ekipi i saj, që ka punuar për 20 vjet në këtë fushë, arritën një avancim të rëndësishëm në vitin 2013 duke rritur një dhëmb nga qeliza njerëzore dhe ato të miut. Ky përparim shënoi një ndryshim në materialin që përdoret për të mbajtur dhëmbin në laborator, duke krijuar një ambient më të ngjashëm me natyrën që lejon zhvillimin e dhëmbëve biologjikë.
Për të krijuar dhëmbin, qelizat e marra nga mishrat e gojës kombinohen me qelizat embrionale të dhëmbit të miut, duke formuar një “lidhje” që nxit zhvillimin e dhëmbit. Materiali i ri, i quajtur hidrogel, mundëson rritjen e strukturave të ngjashme me dhëmbët brenda tetë ditësh, duke sjellë mundësinë e zëvendësimit të qelizave embrionale me ato njerëzore. Avantazhi i dhëmbëve biologjikë është se ata integrohen natyrshëm në indet e pacientit, duke shmangur inflamacionin dhe refuzimin, dhe ofrojnë ndjesinë dhe elasticitetin e një dhëmbi të vërtetë, të cilat mungojnë në implantet artificiale.
Grupet kërkimore po eksplorojnë gjithashtu teknika të tjera për rritjen e dhëmbëve, përmes përdorimit të qelizave njerëzore, qelizave të derrit dhe qelizave burimore të dhëmbëve. Qëllimi përfundimtar është të stimulohet rritja e dhëmbëve në nofullën e njeriut pa përdorimin e qelizave shtazore. Ekspertët parashikojnë se brenda një dekade, riparimi dhe zëvendësimi biologjik i dhëmbëve mund të bëhet një opsion real në klinikat dentare.
