Prokuroria e Tiranës ka përfunduar hetimet për vrasjen e 37-vjeçarit Asim Gjoni, i vrarë nga babai i tij, 74-vjeçari Hekuran Gjoni, natën e 1 shkurtit. Sipas dosjes, ngjarja ka ndodhur pas një debati verbal që ka eskaluar në dhunë fizike; Hekurani ka goditur djalin me një shpullë, për të kaluar më pas në përdorimin e një thike që ndodhej në tavolinën e darkës.
I moshuari është shprehur se ndien pendesë për krimin, duke e cilësuar atë si një veprim impulsiv dhe se është ndjerë i rënduar psikologjikisht nga ngjarja. Prokuroria ka ngritur akuzën “Vrasja për shkak të marrëdhënieve familjare” ndaj Hekuran Gjonit. Gjekë janë gjetur prova si njolla gjaku në tavolinë dhe në tapet, që tregojnë për dhunën e ushtruar.
Detajet e ngjarjes tregojnë se më datë 1 shkurt 2025, në orën 18:40, Hekurani ka debatuar me djalin e tij Asim për motive banale, e më pas ka goditur atë me një mjet prerës, duke shkaktuar vdekjen e tij për shkak të plagës në krahun e majtë.
Personi i pyetur, Valentin Gjoni, ka treguar se ndodhej në katin e tretë të banesës kur ka ndodhur ngjarja. Ai ka theksuar se në shtëpi ishin prindërit dhe motra e tij, ku kishin konsumuar kafe dhe raki për rreth gjysmë ore. Pas kësaj, kur janë larguar, ai është informuar nga motra se po ndodhte një konflikt mes babait dhe Asimit.
Valentini ka gjetur Asimin në gjendje të rëndë, me dëmtime dhe ka tentuar të ndihmojë duke shtrënguar plagën me një peshqir. Ambulanca ka mbërritur për ta transportuar Asimin, ndërsa Valentin ka ndjekur pas me taksi.
Pas ndarjes së katit të shtëpisë, marrëdhëniet në familje ishin tensionuar, veçanërisht për shkak të mardhënies së babait me nusen e Asimit. Këto tensione kishin sjellë konflikte të shpeshta, duke përkeqësuar situatën në familje.
