Vazhdojnë polemikat në Greqi rreth monumentit të Ushtarit të Panjohur në sheshin Sintagma, pas miratimit të një ligji nga qeveria konservatore e kryeministrit Kyriakos Mitsotakis. Ky ligj ndalon protestat pranë këtij monumenti të njohur, që ndodhet përballë parlamentit dhe shërben shpesh si vend referimi për demonstrata.
Opozita e ka kritikuar ashpër këtë amendament, duke akuzuar qeverinë për mungesë të tolerancës dhe për nxjerrjen e përçarjes në shoqëri. Sipas Mitsotakis, ndryshimi i rëndësishëm sjell transferimin e përgjegjësisë për ruajtjen e monumentit te Ministria e Mbrojtjes, me qëllimin për të mbrojtur “normalitetin”.
Sheshi ka marrë rol të rëndësishëm si vend takimi për familjarët e viktimave të tragjedisë hekurudhore në Temp të ndodhur më 28 shkurt 2023. Aty është ngritur një memorial i përkohshëm me emrat e viktimave shkruar në tokë dhe rrethuar me qirinj e lule. Pano Ruci, një prej prindërve të viktimave, zhvilloi një grevë urie për 23 ditë, duke mbledhur rreth vetes qytetarë që kërkojnë drejtësi për aksidentin që mori jetën e 57 personave, shumica studentë.
Amendamenti i ri lejon qasjen publike në monument, por ndalon protestat dhe çdo ndryshim fizik në zonë, me ndëshkime që përfshijnë gjobë ose deri në një vit burgim për shkelësit. Ndërkohë, përgjegjësia për pastrimin e sheshit dhe monumentit është kaluar te Ministria e Mbrojtjes, e cila ka deleguar këtë detyrë një kompanie private, duke sjellë përplasje me Bashkinë e Athinës, e cila më parë mbante këtë përgjegjësi.
Kryebashkiaku Haris Dukas, i mbështetur nga socialistët dhe e majta, ka deklaruar se do të kërkojë drejtësi në institucionet përkatëse, duke e cilësuar vendimin si të padrejtë dhe politikisht të motivuar. Këto zhvillime theksojnë tensionet midis qeverisë dhe opozitës në një kohë kur shoqëria greke është në një pikë të rëndësishme të debati mbi lirinë e protestës dhe të drejtave civile.
