Kandidatja e Partisë Socialiste për Kryetare të Bashkisë së Tiranës, Ogerta Manastirliu, zhvilloi një takim me gratë dhe vajzat e Njësisë nr. 9 për të ndarë vizionin e saj për Tiranën 2030. Ajo theksoi rëndësinë e forcës së komuniteteve dhe bashkëpunimit për ndërtimin e një qyteti më të drejtë dhe gjithëpërfshirës.
Manastirliu shprehu besimin e saj te fuqia e bashkimit të njerëzve dhe nevoja për t’u kujdesur për të gjithë anëtarët e shoqërisë, duke përfshirë fëmijët, gratë, të moshuarit dhe personat me aftësi të kufizuara. Ajo nënvizoi se puna e përbashkët është esenciale për të arritur këtë qëllim dhe se beson tek punët e vogla, që janë ato që e formojnë ndryshimin e madh.
Duke folur për vizionin e saj për Tiranën 2030, Manastirliu u ndal te Rilindja Urbane 2.0. Ajo e cilësoi këtë iniciativë si një përpjekje për të çliruar hapësirat publike dhe për t’i kthyer ato qytetarëve. Sipas saj, është thelbësore të krijohen hapësira që nxisin bashkëjetesën, kulturën dhe qytetarinë në çdo lagje.
Kandidatja e Partisë Socialiste e përshkroi këtë “kati zero”, si hapësirën e përbashkët ku qytetarët ndajnë përvoja dhe jetojnë së bashku. Ajo theksoi rëndësinë e kujdesit për këtë hapësirë, duke përfshirë pastrimin, gjelbërimin dhe zhvillimin e aktiviteteve kulturore.
Manastirliu përfundoi duke shprehur se programi i saj synon mbështetjen e çdo komuniteti, në bashkëpunim me qeverinë dhe qytetarët. Ajo është e bindur se, me mbështetje dhe bashkëpunim, mund të arrihen rezultate të prekshme deri në vitin 2030. Qëllimi i saj është që Rilindja Urbane 2.0 të shtrihet në çdo lagje dhe të bëjë ndryshime të dukshme dhe pozitive për Tiranën dhe banorët e saj.
