Burime të besueshme pranë institucioneve të drejtësisë bëjnë me dije se SPAK i ka dërguar Kuvendit të Shqipërisë një kërkesë për heqjen e imunitetit të zëvendëskryeministres dhe ministres së Infrastrukturës dhe Energjisë, Belinda Balluku, në mënyrë që ajo të merret e pandehur për një sërë aferash të dyshuara korruptive.
Sipas burimeve, kërkesa është dërguar në ditët e fundit, por ende nuk është bërë publike nga Kuvendi i Shqipërisë, ndërsa deri më tani nuk ka një reagim zyrtar as nga institucionet e drejtësisë, as nga vetë ministrja Balluku.
Gazetari që ka siguruar këtë informacion thekson se ka kërkuar sqarim zyrtar nga Zyra e Kuvendit, duke ngritur disa pyetje të drejtpërdrejta për transparencë publike:
- A ka mbërritur në Kuvend kërkesa e SPAK për heqjen e imunitetit të Belinda Ballukut?
- Nëse po, pse kjo kërkesë nuk është bërë publike për qytetarët?
- Nëse jo, a do të ketë një reagim zyrtar për të sqaruar saktësinë e këtij informacioni?
Belinda Balluku është një nga emrat më të përfolur në kabinetin qeveritar për afera të shumta korruptive, që përfshijnë:
- Tunelin e Llogarasë,
- Aeroportin e Vlorës,
- Anijet për prodhimin e energjisë në Vlorë,
- Rrugën Thumanë–Kashar,
- projektin “Tigrat”,
- dhe çështjen e inceneratorëve.
Në këto dosje, sipas hetimeve dhe raportimeve të mëparshme, dyshohet se Balluku ka vepruar nëpërmjet drejtorëve të saj të afërt, si Ceno Klosi, Ervis Berberi, Klevis Jahaj dhe Maksim Et’hemaj, të cilët kanë qenë të përfshirë në tendera dhe kontrata publike me vlera të mëdha.
Nëse ky informacion konfirmohet zyrtarisht, kërkesa për heqjen e imunitetit të një anëtareje të qeverisë do të përbënte një zhvillim të paprecedentë politik dhe institucional, duke sinjalizuar një fazë të re të hetimeve të SPAK ndaj zyrtarëve të lartë të pushtetit.
Për momentin, pritja është te reagimi zyrtar i Kuvendit të Shqipërisë për të konfirmuar ose mohuar ekzistencën e kësaj kërkese.
