Në ditën e dytë të qëndrimit të saj në Izrael, Ministrja për Evropën dhe Punët e Jashtme, Elisa Spiropali, u takua me homologun e saj, Gideon Sa’ar. Gjatë bisedës, Spiropali u fokusua te marrëveshja e paqes dhe plani i Presidentit amerikan, Donald Trump, i cili sipas saj, ofron mundësinë për një kapitull të ri të sigurisë dhe stabilitetit në rajon.
Ministrja theksoi se plani 20-pikësh ka potencialin për të sjellë stabilitet të qëndrueshëm dhe për të nxitur bashkëjetesën midis izraelitëve dhe palestinezëve. Ajo përmendi gjithashtu trashëgiminë morale të popullit shqiptar, duke rikujtuar se Shqipëria strehoi hebrenjtë gjatë Luftës së Dytë Botërore. “Ne u bëmë vendi i vetëm në Evropë ku popullsia hebraike u rrit gjatë Holokaustit,” nënvizoi Spiropali, duke shprehur krenarinë për këtë trashëgimi historike.
Ministrja falënderoi Izraelin për njohjen e Republikës së Kosovës dhe shprehu dëshirën për thellimin e marrëdhënieve midis dy vendeve. Ajo nënvizoi se marrëdhënia po zhvillohet në fusha të ndryshme si inovacioni, shëndetësia, arsimi, turizmi dhe bujqësia. Spiropali shprehu kënaqësinë që Shqipëria ka shumë për të mësuar nga përvoja e Izraelit në teknologji dhe shkencë.
Gjatë vizitës, të dy ministrat nënshkruan një memorandum bashkëpunimi që fokusohet në diplomacinë publike dhe trajnimin e diplomatëve të rinj. Spiropali u takua gjithashtu me Kryetarin e Kuvendit të Izraelit, Amir Ohana, duke rikonfirmuar mbështetje për proceset që promovojnë stabilitetin në rajon.
Në përfundim, Spiropali theksoi rëndësinë e ndërtimit të urave dhe partneriteteve të reja për të rinjtë dhe sipërmarrësit, duke shpresuar në një të ardhme më të ndritur për të dy vendet.
