Një operacion i gjerë ndërkombëtar kundër krimit kibernetik, i quajtur “SIMCARTEL”, përfundoi me sukses me 7 arrestime dhe shkatërrimin e një rrjeti kriminal të sofistikuar që vepronte në disa vende të Europës. Aksioni, i zhvilluar më 10 tetor në Letoni, rezultoi në arrestimin e pesë shtetasve letonë, si dhe në sekuestrimin e 5 serverave, 1,200 pajisjeve SIM-box dhe 40,000 kartave SIM aktive. Dy persona të tjerë u arrestuan gjatë hetimeve.
Sipas raportimeve nga Europol dhe Eurojust, rrjeti kishte kryer mbi 3,200 raste mashtrimi kibernetik, duke shkaktuar një dëm të konsiderueshëm financiar prej disa milionësh eurosh. Vetëm në Austri, dëm i shkaktuar arrin në rreth 4.5 milionë euro, ndërsa në Letoni ka arritur në 420,000 euro.
Ky rrjet ofronte numra telefoni të regjistruar në mbi 80 vende, të cilët përdoren për mashtrime të tilla si phishing dhe smishing, që kishin si synim vjedhjen e të dhënave personale dhe llogarive bankare. Hetimet treguan se përmes kësaj skeme ishin krijuar rreth 49 milionë llogari online false, që shfrytëzoheshin për mashtrime financiare, trafikim, dhe shpërndarje të materialeve të abuzimit seksual me fëmijë.
Gjatë operacionit u kryen gjithsej 26 kontrolle, dhe autoritetet sekuestruan qindra mijëra karta SIM të tjera, përveç 4 automjeteve luksoze. Po ashtu, u ngrinë 431,000 euro në llogari bankare dhe 333,000 dollarë në kriptomonedha.
Ky operacion u realizua në bashkëpunim mes Austrisë, Estonisë, Finlandës dhe Letonisë, nën koordinimin e Europol dhe Eurojust. Hetimet për këtë rrjet të gjerë të krimit kibernetik janë në vazhdim, me autoritetet që dyshojnë se dëm i shkaktuar mund të jetë shumë më i madh se ai që është dokumentuar deri tani.
