Burime të sigurta pranë qeverisë bëjnë me dije për portalin Timoni.al për një lëvizje të fortë politike në kabinetin qeveritar, ku Kryeministri Edi Rama i ka kërkuar Ministres së Infrastrukturës dhe Energjisë, Belinda Balluku, të dorëzojë detyrën dhe të largohet nga posti i saj.
Sipas burimeve, vendimi lidhet me rritjen e presionit publik dhe hetimeve në disa dosje të ndjeshme, që aktualisht ndodhen në SPAK. Bëhet fjalë për projektet e mëdha infrastrukturore si tuneli i Llogarasë, rruga Thumanë–Kashar dhe kontratat për anijet e prodhimit të energjisë në Vlorë, të cilat janë vënë nën lupën e Prokurorisë së Posaçme.
Po ashtu, hetimet e SPAK-ut janë shtrirë edhe mbi disa drejtori vartëse të ministrisë, përfshirë OSHEE, KESH dhe Drejtorinë e Transportit Rrugor, ku dyshohet se janë kryer shkelje të rënda procedurale dhe abuzime me fondet publike.
Burime nga mazhoranca pohojnë se Rama ka kërkuar një “pastrim të imazhit qeveritar”, ndërsa Balluku pritet të mbajë qëndrim publik në ditët në vijim.
Në qarqet politike flitet se hetimet e SPAK-ut mund të çojnë në zhvillime të reja që do të ndikojnë ndjeshëm në ekuilibrat brenda mazhorancës.
Ndërkohë, nga Ministria e Infrastrukturës nuk ka ende një reagim zyrtar, por situata mbetet e tensionuar, dhe burimet brenda qeverisë flasin për një krizë besimi mes Ramës dhe Ballukut, që mund të çojë në një ndryshim të afërt ministror.
