Autoritetet holandeze njoftuan se do të therin rreth 161,000 pula në një fermë shpendësh në qendër-lindje të vendit për shkak të një shpërthimi të gripit të shpendëve. Pas zbardhjes së situatës, është vendosur një ndalim udhëtimi për një rreth prej 10 kilometrash që prek dhe 26 ferma të tjera përreth. Një javë më parë, Ministria e Bujqësisë urdhëroi fermerët që të mbajnë zogjtë e tyre brenda për të parandaluar përhapjen e virusit.
Nga ana tjetër, Belgjika shpalli një urdhër që gjithashtu kërkon mbajtjen e zogjve brenda, duke filluar nga 23 tetori, pas një shpërthimi të gripit të shpendëve H5N1 në një fermë në Francë. Sipas Organizatës Botërore për Shëndetin e Kafshëve (WOAH), deri tani, 319 zogj kanë ngordhur në Belgjikë, ndërsa 67,110 të tjerë do të theren si masë parandaluese.
Një ngjarje e ngjashme është regjistruar edhe në Sllovaki, në një fermë pranë kufirit me Poloninë, ku janë raportuar 27 zogj të ngordhur dhe do të therren gjithsej 197 pula, rosa dhe pata të rritura. Përhapja e gripit të shpendëve po krijon shqetësime serioze për qeveritë dhe fermerët europianë, të cilët përballen me sasi të mëdha zogjsh të ngordhur ose të therur për arsye parandaluese. Kjo ka ndikuar negativisht në zinxhirin e furnizimit dhe ka rezultuar në rritjen e çmimeve të ushqimeve.
Ekspertët e shëndetit publik paralajmërojnë për rrezikun e mundshëm të një pandemie të re në rast se virusi pëson mutacione që mund të infektojnë njerëzit. Situata në fjalë thekson rëndësinë e masave parandaluese dhe të koordinimit ndërkombëtar për të parandaluar përhapjen e virusit dhe minimizuar efektet e tij në sektorin e bujqësisë dhe shëndetit publik.
