Në Gramsh, vlerësimi i dëmeve nga zjarri i 11 gushtit ka përfunduar, pas një periudhe të gjatë shqyrtimi. Një faturë prej rreth 31 milionë eurosh është dërguar në Agjencinë Kombëtare të Mbrojtjes Civile për të filluar ndërhyrjet e nevojshme.
Grupet e punës, të angazhuar për të evidentuar dëmet, kanë raportuar se 68 shtëpi janë prekur nga zjarri, me 10 prej tyre të shkrumbuar plotësisht dhe 42 pjesërisht. Zyra e urbanistikës në Bashkinë e Gramshit tani është në procesin e hartimit të projekteve për rindërtimin dhe rikonstruksionin e këtyre banesave.
Përveç dëmeve në shtëpi, raportet po ashtu përfshijnë humbjet në bagëti, të mbjella, stallat dhe pyjet. Në fshatrat e Njësisë Skëndërbegas dhe njësive tjetër që u prekën, janë regjistruar ngordhjet e 215 bagëtive të imta, 9 gjedhëve dhe 7 njëthundrakëve.
Sipas bilancit të dëmeve, zjarri shkrumboi një sipërfaqe të madhe, duke prekur 44,045 hektarë ullinj, 11,028 hektarë rrush, 1,451 hektarë bimë medicinale dhe 9.5 hektarë pemë frutore dhe arrorë. Dëmet janë të konsiderueshme, duke theksuar nevojën për një ndërhyrje të shpejtë dhe efikase për rikuperimin e zonës dhe mbështetje për ata që kanë humbur gjithçka.
