Harta e zonave të mbrojtura në Shqipëri do të zgjerohet, duke përfshirë qendrat historike, arkitekturore dhe urbane. Gjatë një konference të mbajtur për 60-vjetorin e Institutit Kombëtar të Trashëgimisë Kulturore, ministri i Turizmit, Kulturës dhe Sportit, Blendi Gonxhe, njoftoi se pas vendeve si Rabdishti, Peshkopi, Konispol dhe zonën arkeologjike të Linit, do t’i shtohet edhe qyteti i Delvinës.
Ministri theksoi rëndësinë e krijimit të një agjencie të re për menaxhimin e pasurive kulturore. Ai përmendi se kjo agjenci do të jetë një hap i rëndësishëm për të mundësuar monetizimin e trashëgimisë kulturore, me qëllimin që vlerat e fituara të investohen përsëri në fushën e trashëgimisë.
Përveç kësaj, Gonxhe njoftoi se një listë prej 25 vilash historike do t’i kalojë nën administrimin e institucioneve të ndryshme kulturore. Ai shpjegoi se këto vila, shumica e të cilave ndodhen në zona kryesore të vendit, do të përfshihen në një paketë shpronësimesh, për të siguruar administrim më të mirë dhe për të mbështetur institucionet që aktualisht nuk kanë zyra të përshtatshme.
Në konference u diskutua gjithashtu për implementimin e një sistemi të ri biletimi për kalatë dhe për rritjen e tarifave për bizneset që operojnë brenda këtyre objekteve historike. Gonxhe njoftoi se për herë të parë, tarifat do të jenë pesëfishuar, duke e justifikuar këtë me përpjekjet për rijetëzim të projekteve kulturore. Ai përmendi se do të ketë një sistem integrale biletimi për të gjitha sitet, duke pasur parasysh kostot e larta të sistemit ekzistues.
Këto nisma, sipas ministrit, synojnë të rrisin vlerën e trashëgimisë kulturore dhe të sigurojnë një administrim më efektiv të saj, duke datuar dhe përmirësuar infrastrukturën dhe shërbimet që ofrohen për vizitorët.
