Prokuroria e Posaçme Anti-Korrupsion (SPAK) ka përfunduar hetimet për një grup të strukturuar kriminal i dedikuar trafikimit të paligjshëm të shtetasve shqiptarë drejt Shteteve të Bashkuara të Amerikës. Në përfundim të hetimeve, kanë përfunduar në gjykim pesë individë, përfshirë drejtuesin e grupit, Luc Melaj. Ai akuzohet për një sërë veprash penale, përfshirë “Ndihmë për kalim të paligjshëm të kufijve”, “Falsifikim dokumentesh”, dhe “Grup të strukturuar kriminal”.
Të tjerët që do të përballen me drejtësinë janë Gëzim Camaj, Emanuel Melaj, Tonin Melaj dhe Bashkim Çokaj, të akuzuar për bashkëpunim në këtë veprimtari të paligjshme dhe shpërdorim detyre. Sipas hetimeve, grupi kishte organizuar kalimin e të paktën 25 shtetasve shqiptarë, për një shpërblim që arrinte deri në 45 mijë dollarë për person.
Operacionet e trafikut niseshin nga Shqipëria, përshkonte disa vende europiane dhe përfundonte në SHBA përmes Meksikës. Në këtë aktivitet të paligjshëm ishin përfshirë edhe disa punonjës policie në pikat kufitare, të cilët kontribuonin duke mos regjistruar kalimet e individëve me probleme ligjore në vendet e Bashkimit Europian.
Hetimet janë zhvilluar në bashkëpunim me institucionet e tjera, përfshirë Byronë Kombëtare të Hetimit dhe Shërbimin e Sigurisë Diplomatike të SHBA-së, si dhe Policinë e Shtetit dhe njësinë speciale “Mburoja e Përbashkët”. SPAK njofton se hetimet për persona të tjerë të përfshirë në këtë rrjet ndërkombëtar trafiku do të vazhdojnë, duke pasur parasysh përmasat e aktivitetit kriminal të zbuluar.
Ky rast thekson sfidat e mëdha të luftës ndaj trafikimit të njerëzve dhe rëndësinë e bashkëpunimit ndërkombëtar për të ndaluar këto aktivitete të paligjshme.
