Në Prokurorinë e Posaçme Kundër Korrupsionit dhe Krimit të Organizuar (SPAK) është dorëzuar një kallëzim penal me akuza të rënda ndaj kandidates së Partisë Socialiste për Bashkinë e Vlorës, Brunilda (Bruna) Mersini, bashkëshortit të saj Genc Mersini dhe ndërtuesit të njohur Alaudin Malaj.
Kallëzimi është depozituar nga shtetasi Mentor Mustafaraj, i cili pretendon se ka prova konkrete për një skemë të mirëorganizuar korrupsioni, pastrimi parash, falsifikimi dokumentesh dhe grabitje pronash, të zhvilluar në mënyrë të koordinuar midis funksionarëve publikë dhe biznesmenëve.
Sipas dokumentit të dorëzuar në SPAK, ku përmenden konkretisht dispozitat penale të cituara, të kallëzuarit akuzohen për disa vepra penale të parashikuara në Kodin Penal:
- Korrupsion aktiv i personave që ushtrojnë funksione publike (neni 244 i Kodit Penal), që lidhet me veprimtarinë e Brunilda Mersinit si drejtoreshë e Spitalit Rajonal Vlorë dhe bashkëshortit të saj Genc Mersini, mjek ortoped në të njëjtin institucion;
- Grup i strukturuar kriminal (neni 333), me organizator të supozuar Alaudin Malaj;
- Pastrimi i produkteve të veprës penale (neni 287), ku përfshihen të tre personat e kallëzuar;
- Shkelja e barazisë së pjesëmarrësve në tendera publikë (neni 258), lidhur me tenderat e zhvilluar në Spitalin Rajonal Vlorë nën drejtimin e Brunilda Mersinit.
Pretendimet e kallëzimit: kontrata fiktive, falsifikime dhe pasuri të fshehura pas tenderave
Në kallëzimin e detajuar, i cili përfshin dhjetëra faqe dokumente dhe prova të bashkëngjitura, kallëzuesi Mustafaraj deklaron se ndërtuesi Alaudin Malaj, në bashkëpunim me Brunilda dhe Genc Mersini, ka përdorur dokumente të falsifikuara për të realizuar një kontratë fiktive për një apartament me sipërfaqe totale 711 metra katrorë në zonën e Ujit të Ftohtë në Vlorë.
Sipas kallëzuesit, kontrata është regjistruar me numrin 2627 Repertor, nr. 1390 Koleksion, datë 08.06.2021, dhe planimetria e bashkëngjitur është e falsifikuar, pasi nuk përputhet me lejen e ndërtimit të dhënë nga Bashkia Vlorë me vendimet nr. 2/29 dhe 2/30, datë 28.09.2011.
Në këtë kontratë, thuhet se sipërmarrësi do të dorëzojë një apartament 711 m² për vlerën e 300 mijë eurove, ndërkohë që sipas Mustafarajt, vlera reale e ndërtimit arrin në mbi 1 milion euro.
Në kallëzim theksohet se planimetria është përgatitur nga një inxhiniere e jashtme, Alma Xhema, dhe është përdorur për të maskuar ndërhyrje të paligjshme në objekt, ku dy kate banimi janë kthyer në hotel dhe lokal, pa marrë leje ndërtimi dhe pa pëlqimin e pronarëve të truallit.
Kallëzuesi: “Më kanë grabitur pronën dhe kanë ndërtuar pa leje mbi truallin tim”
Mustafaraj thotë se është bashkëpronar i truallit ku është ndërtuar objekti, me kartelë pasurie nr. 36/130, volum 59, faqe 212, zona kadastrale 8602, “Uji i Ftohtë”, me sipërfaqe 1600 m².
Sipas tij, ndërtuesi Malaj, në bashkëpunim me çiftin Mersini, ka ndërhyrë në konstruksionin e godinës, ka bashkuar apartamente të ndryshme për të krijuar një apartament gjigand dhe më pas një hotel, duke e ndryshuar zërin kadastral nga banesë në njësi biznesi – veprime që, sipas kallëzuesit, janë kryer pa leje ndërtimi dhe në kundërshtim me ligjin urbanistik.
Në kallëzim thuhet se këto punime janë kryer “në fshehtësi, pa marrëveshje me pronarët e tjerë të truallit, pa leje prishjeje, pa miratim nga Bashkia Vlorë dhe jashtë çdo norme ligjore”.
Dyshimet për korrupsion dhe pastrim parash përmes tenderave të Spitalit të Vlorës
Një pjesë e rëndësishme e kallëzimit lidhet me dyshimet për pastrim parash dhe përfitime korruptive të çiftit Mersini përmes tenderave publikë të zhvilluar nga Spitali Rajonal i Vlorës.
Mustafaraj kërkon që SPAK të hetojë të gjitha tenderat që janë zhvilluar gjatë drejtimit të Brunilda Mersinit, si kryetare e entit prokurues, të sekuestrojë dokumentet financiare, si dhe të verifikojë raportet e Kontrollit të Lartë të Shtetit (KLSH) mbi aktivitetin financiar të spitalit.
Sipas kallëzimit, ekzistojnë “dyshime të arsyeshme se fondet e përfituara përmes tenderave janë përdorur për të financuar ndërtimin dhe përshtatjen e kateve të ndërtesës si hotel dhe lokal”.
Episodi i tensionuar: “Do t’i marr pasuritë dhe nuk mi merr dot njeri”
Në një pjesë të kallëzimit, Mustafaraj rrëfen një takim të zhvilluar më 15 dhjetor 2021 në zyrën e tij në Vlorë, ku sipas tij, Genc Mersini është paraqitur bashkë me administratorin e kompanisë që kryente punimet në hotel, duke deklaruar se kishte blerë katin e shtatë nga Alaudin Malaj, “pas një kredie të madhe që kishte marrë”.
Sipas Mustafarajt, Mersini i ka thënë:
“Do i marr pasuritë nga Alaudin Malaj dhe ti nuk mi merr dot mua dhe gruas time. Do i legalizoj vetë.”
Kallëzuesi e konsideron këtë deklaratë si shantazh të hapur dhe provë të bashkëpunimit të paligjshëm për tjetërsim prone mbi bazë vendimesh gjyqësore të pezulluara nga Gjykata e Lartë.
Vendimet e gjykatave dhe kërkesat për veprime hetimore
Në kallëzim përmendet edhe vendimi nr. 321 datë 28.12.2020 i Gjykatës së Apelit Vlorë, i cili ka urdhëruar Prokurorinë e Vlorës të regjistrojë procedimin penal dhe të hetojë mbi kontratat fiktive dhe veprimet e palëve, pasi kishte “dyshime se kontratat ishin pa qëllim real, pra fiktive”.
Mustafaraj kërkon që SPAK të kryejë këto veprime hetimore:
- Sekuestrimin e dokumenteve të lejeve të ndërtimit dhe ndryshimeve të zërit kadastral;
- Caktimin e ekspertëve urbanistë, arkitektë dhe inxhinierë për të vlerësuar ndërhyrjet në objekt;
- Sekuestrimin e kontratave të tenderave të Spitalit Rajonal Vlorë;
- Hetimin e burimeve të financimit të punimeve në katet e shtatë dhe të tetë;
- Dhe regjistrimin e procedimit penal për veprat e kallëzuara.
SPAK pritet të shqyrtojë kallëzimin
Burime pranë organit të akuzës konfirmojnë se kallëzimi është protokolluar në SPAK, dhe se pritet të kalojë në fazën e parë të verifikimeve paraprake.
Në këtë fazë, prokurorët e posaçëm do të analizojnë materialet e dorëzuara dhe do të vendosin nëse do të regjistrojnë procedim penal ndaj personave të kallëzuar.
Deri më tani, nuk ka asnjë reagim zyrtar nga Brunilda Mersini, bashkëshorti i saj Genc Mersini apo ndërtuesi Alaudin Malaj lidhur me këto akuza.
As SPAK nuk ka bërë ndonjë deklaratë mbi këtë kallëzim.
