Trajneri i Bolongnas, Vincenzo Italiano, është shtruar në spital për shkak të pneumonisë me origjinë bakteriale, sipas njoftimit të publikuar nga klubi italian. Ai ndodhet aktualisht në departamentin e pulmonologjisë të Poliklinikës Sant’Orsola-Malpighi, nën kujdesin e mjekut Stefano Nava. Sipas deklaratës, gjendja e tij nuk është e lidhur me COVID-19, por kërkon trajtim të veçantë me antibiotikë.
Drejtuesit e klubit njoftuan se trajneri do të qëndrojë i shtruar për rreth pesë ditë dhe se gjendja klinike e tij është duke u përmirësuar gradualisht. Ata premtuan se do të ofrojnë përditësime në lidhje me shëndetin e tij në ditët në vijim.
Për shkak të kësaj situate, Italiano do të mungojë në ndeshjen e Europa League të së enjtes, ku Bologna do të përballet me Steaua Bukureshtin. Klubi ka shprehur mbështetje të plotë për trajnerin dhe i ka dëshiruar shërim të shpejtë, duke shpresuar për rikthimin e tij të shëndetshëm në pankinë.
