Qeveria izraelite ka kërkuar nga kryeministri kanadez, Mark Carney, të tërhiqet nga deklarata e tij mbi respektimin e një urdhri arresti të lëshuar nga Gjykata Ndërkombëtare Penale për kryeministrin izraelit, Benjamin Netanyahu, në rast se ai udhëton në Kanada. Zëdhënësja e qeverisë izraelite, Shosh Bedrosian, theksoi gjatë një konference për shtyp se Carney duhet ta rishqyrtojë qëndrimin e tij dhe të mirëpresë Netanyahu, duke e cilësuar atë si udhëheqësin e “të vetmit shtet hebre”.
Gjykata Penale Ndërkombëtare me seli në Hagë ka lëshuar një urdhër arresti për Netanyahu, duke e akuzuar atë për krime lufte dhe krime kundër njerëzimit, të kryera gjatë ofensivave në Rripin e Gazës. Nga ana tjetër, Izraeli e ka dënuar këtë vendim, duke mohuar juridiksionin e gjykatës dhe çdo përgjegjësi për krime lufte në këtë konflikt.
Bedrosian gjithashtu kritikoi vendimin e fundit të Kanadasë për të njohur një shtet palestinez, duke e quajtur atë “një shpërblim për terrorizmin” dhe një akt që, sipas saj, e ka intensifikuar antisemitizmin në Kanada.
