Princi Andrew, i cili ka jetuar në rezidencën luksoze Royal Lodge në Windsor për më shumë se 20 vjet, nuk ka paguar asnjë qira për këtë pronë. Sipas një kontrate të siguruar nga “The Times”, Andrew ka jetuar në këtë shtëpi me 30 dhoma me një qira simbolike prej “një kokërr piperi në vit”. Ai pagoi 1 milion paund për kontratën dhe investoi 7.5 milion paund në rikonstruksionin e saj, duke siguruar të drejtën për të jetuar aty deri në vitin 2078 pa pagesë vjetore qiraje.
Nëse vendos të largohet, Crown Estate do të duhet t’i paguajë atij rreth 558 mijë paund si kompensim deri në vitin 2028. Kjo situatë ka shkaktuar reagime të forta politike; ish-ministri Robert Jenrick kërkoi largimin e menjëhershëm të princit, duke theksuar se publikun e bezdis situata e tij dhe se taksat e qytetarëve nuk duhet të shkojnë për mbështetje të stilit të tij të jetesës.
Ky skandal ndodhi pas humbjes së titujve zyrtarë si Dukë i Yorkut pas lidhjes së tij me Jeffrey Epstein. Ai tani mban vetëm titullin “Princ”, sipas rregullave të vendosura nga mbreti George V. Po ashtu, policia metropolitane po heton pretendimet se ai ka kërkuar informacione për kallëzuesen e tij, Virginia Giuffre, akuzat e të cilës ai i mohon.
Royal Lodge ndodhet në një sipërfaqe prej 40 hektarësh në Windsor Great Park dhe përfshin ambiente për stafin dhe oficerët e sigurisë. Mbreti Charles po përpiqet ta bindë Andrew të kalojë në Frogmore Cottage, një shtëpi më modeste, si pjesë e një plani për të zvogëluar privilegjet e tij.
Financat e princit janë gjithashtu në pikëpyetje pas heqjes së mbështetjes financiare mbretërore vitin e kaluar. Andrew tani jeton me një pension prej 20 mijë paund në vit, ndërsa ndihma e tij vjetore arrin në rreth 3 milion paund, duke ngjallur shqetësime për mënyrën se si financohet stili i tij i jetesës.
