Ish-presidenti francez Nicolas Sarkozy ka filluar zyrtarisht dënimin e tij me pesë vjet burg për konspiracion në financimin e paligjshëm të fushatës presidenciale të vitit 2007. Ai shënon rastin e parë të një ish-udhëheqësi francez që shkon pas hekurave në epokën moderne. Gjykata e akuzoi atë se fushata e tij ishte financuar me miliona euro nga diktatori libian Muammar Gaddafi.
Sarkozy, 70 vjeç, u paraqit sot në burgun “La Santé” në jug të Parisit, ku është vendosur në një qeli të vogël me disa komoditete, përfshirë tualet dhe televizor. Ai do të mbahet në seksionin e izolimit për arsye sigurie, duke qenë se burgu strehon gjithashtu persona të dënuar për krime të rrezikshme si trafikimi i drogës dhe terrorizmi.
Gjykata urdhëroi ekzekutimin e menjëhershëm të dënimit, pavarësisht apelit të Sarkozy-t, duke theksuar “seriozitetin e jashtëzakonshëm të fakteve” që lidhen me rastin e tij. Ish-presidenti ka këmbëngulur në pafajësinë e tij, duke thënë: “Nuk kam frikë nga burgu. Do ta mbaj kokën lart, përfshirë edhe te portat e burgut”.
Më shumë se njëzet mbështetës u mblodhën jashtë burgut në shenjë solidariteti pas thirrjes së djalit të tij, Louis Sarkozy. Presidenti Emmanuel Macron e priti atë ditë më parë në Pallatin Élysée, duke e konsideruar këtë vizitë si “një gjest njerëzor ndaj një paraardhësi”. Edhe ministri i Drejtësisë, Gérald Darmanin, shprehu gatishmërinë për ta vizituar në burg, duke theksuar: “Nuk mund të jem i pandjeshëm ndaj vuajtjes së një njeriu”.
Ky rast thekson tensionet politike dhe etike në Francë, ku ish-liderët janë gjithnjë e më të shpesh në qendër të vëmendjes për përballje me sistemin e drejtësisë. Dënimi i Sarkozy-t mund të ketë impakte të shumta në skenën politike franceze dhe në perceptimin publik të autoriteteve.
