Një pjesë e krahut lindor të Shtëpisë së Bardhë ka filluar të shembet për të vazhduar me ndërtimin e një salle të re ballosh, pjesë e projektit 250 milion dollarësh të Presidentit Donald Trump për “modernizimin e plotë” të rezidencës presidenciale. Ekipet e ndërtimit janë parë duke rrëzuar hyrjen lindore dhe disa dritare, ndërsa administrata ka konfirmuar se punimet do të vazhdojnë në muajt në vijim.
Presidenti Trump ka deklaruar se salla e re do të ndërtohet “afër, por pa prekur strukturën ekzistuese”, duke e përshkruar projektin si “një shtesë madhështore që i tregon respekt historisë së ndërtimit”. Ai ka theksuar në rrjetet sociale se janë hedhur themelet për një hapësirë të nevojshme për evente madhështore dhe vizita shtetërore, duke shtuar se financimi vijon “plotësisht nga patriotë bujarë”, pa zbuluar identitetet e donatorëve.
Megjithatë, ndërhyrja ka ngjallur debate në qarqet historike dhe arkitektonike për mungesën e transparencës dhe processit të rishikimit nga Shërbimi i Parqeve Kombëtare (NPS). Ish-historiani i NPS-së, Robert K. Sutton, ka kritikuar lëvizjen e projektit, duke theksuar se “i gjithë projekti po ecën përpara pa një proces të plotë shqyrtimi”, që sipas tij është e papërshtatshme për ndërtesën më të rëndësishme ekzekutive në botë.
Raportet thonë se salla e re do të ketë kapacitet për të strehuar midis 600 deri në 900 të ftuar, me vizatime që tregojnë ambiente luksoze, llambadarë ari dhe hapësira të përshtatshme për evente të mëdha. Kjo rritje në kapacitet përbën një pjesë thelbësore të përmirësimit të infrastrukturës së Shtëpisë së Bardhë dhe synon të përmirësojë ngjarjet zyrtare që organizohen aty.
Punimet për ndërtimin e Krahut Lindor vijojnë me ritme të shpejta, duke sjellë një transformim të konsiderueshëm për këtë pjesë të historisë amerikane.
