Në Aeroportin e Rinasit janë kapur 61 kilogramë kanabis laboratorik, ndërsa dy shtetas kinezë janë arrestuar në tentativë për të hyrë në Shqipëri me drogën. Sipas autoriteteve, ata ishin nisur nga Tajlanda dhe kishin kaluar tranzit në Emiratet e Bashkuara.
Operacioni policor i koduar “Quality” u finalizua nga Departamenti i Policisë Vendore Tiranë, Policia Kufitare e Rinasit, Njësia e Informacionit për Pasagjerin dhe Drejtoria e Hetimit Doganor. Ky operacion shënon një sukes të rëndësishëm në luftën kundër trafikimit të lëndëve narkotike, veçanërisht kanabisit me përqindje të lartë THC.
Policia njofton se lënda e dyshuar narkotike, Cannabis Sativa, ishte e ndarë në 120 pako dhe u sekuestrua pas identifikimit të dy kinezëve, Y. G. (37 vjeç) dhe Ch. J. (48 vjeç), të cilët u kapën në flagrancë me dy valixhe mbushur me narkotikë. Sasi e kapur dyshohet se ka qenë e destinuar për tregun shqiptar.
Duke vazhduar operacionet e fundit, Policia e Tiranës ka shprehur angazhimin për të goditur trafikimin e lëndëve narkotike dhe për të mbajtur nën vëzhgim çdo përpjekje të tillë. Hetime të thelluara janë duke u zhvilluar për të identifikuar dhe ndëshkuar edhe persona të tjerë që mund të jenë të implikuar në këtë veprimtari kriminale.
Materialet procedurale janë dërguar në Prokurorinë e Tiranës për veprime të mëtejshme. Autoritetet vazhdojnë punën për të garantuar sigurinë publike dhe për të minimizuar rreziqet nga trafikimi i drogës në territorin shqiptar.
