Të dielën e kaluar, Maqedonia e Veriut zhvilloi raundin e parë të zgjedhjeve lokale për kryetarët e komunave, ndërsa raundi i dytë është planifikuar për datën 2 nëntor.
Rezultatet e deritanishme, pas përpunimit të 99,94% të votave nga Komisioni Shtetëror i Zgjedhjeve, tregojnë se partia VMRO-DPMNE dhe koalicioni i saj janë në krye në 53 komuna. Koalicioni VLEN udhëheq në 9 komuna, ndërsa LSDM dhe koalicioni i saj në 8 komuna. Aleanca Kombëtare për Integrim (AKI) ka fituar në 5 komuna, ndërsa disa parti më të vogla dhe kandidatë të pavarur kanë arritur të fitojnë në një komunë secila.
Kandidaturat e VMRO-DPMNE-së udhëhoqën në komuna si Aerodrom, Manastir, Gjevgjeli, dhe Prilep, ndërsa LSDM fitoi më shumë vota në Bogdanci, Kriva Pallankë e disa të tjera. Koalicioni VLEN pati sukses në Haraçinë, Tetovë dhe Çair, ndërsa AKI fitoi në Vrapçisht, Gostivar dhe Likovë. Maqim Dimitrievski i Lëvizjes ZNAM udhëhoqi në Kumanovë, ndërsa kandidatë të pavarur si Mendi Qura dhe Azem Sadiku fituan në Strugë dhe Studeniçan.
Disa komuna, përfshirë Qendër Zhupë, Mavrovë dhe Rostushë, do të duhet të përsërisin raundin e parë, pasi nuk arritën të realizojnë censusin e nevojshëm; në këto komuna, pjesëmarrja e votuesve ishte nën një të tretën e të regjistruarve.
Zgjedhjet për kryetarët e komunave u zhvilluan sipas modelit mazhoritar, ndërsa zgjedhjet për anëtarët e këshillave komunalë janë bërë sipas modelit proporcional, të dyja në një raund të vetëm.
Ky proces zgjedhor paraqet një hap të rëndësishëm në administratën lokale, me rezultate që do të ndikojnë në zhvillimin politik të vendit. Nga ana tjetër, përmbushja e kërkesave për pjesëmarrje në votime do të jetë çelësi për funksionimin e duhur të këtyre trupave.
