Në orët e mbrëmjes, në Qendrën Spitalore Universitare “Nënë Tereza” ka mbërritur 6-vjeçarja N.A., e cila ishte lënduar rëndë në një ngjarje tragjike në Maliq, ku banesa e saj kishte shpërthyer në flakë. Babai i saj, nënë dhe vëllai humbën jetën nga incidenti, ndërsa vogëlushja u dërgua menjëherë për trajtim mjekësor.
Ministria e Shëndetësisë njoftoi se N.A. u prit në urgjencën e Shërbimit të Djegie-Plastikës, ku ekipi mjekësor ishte në kontakt të vazhdueshëm me mjekët që e shoqëronin gjatë transportit nga Korça në Tiranë. Pas një vlerësimi të detajuar të gjendjes së saj, N.A. u hospitalizua në Shërbimin e Terapisë Intensive të Pediatrisë, në gjendje kritike për jetën. Ajo po trajtohet nga një grup specialistësh, përfshirë pediatër dhe reanimatorë, sipas protokolleve mjekësore të përcaktuara.
Pas mbërritjes së 6-vjeçares, Ministrja e Shëndetësisë dhe Mirëqenies Sociale, Prof. Evis Sala, arriti në QSUT bashkë me drejtoreshën e përgjithshme të QSUNT, Anxhela Paparizo, dhe po ndjekin ngushtësisht evolucionin e gjendjes së saj, duke qëndruar në kontakt me ekipin mjekësor.
Ministria e Shëndetësisë shprehu ngushëllimet për humbjen e anëtarëve të familjes dhe njoftoi se po qëndron në komunikim të vazhdueshëm me QSUT për të marrë informacione mbi gjendjen shëndetësore të N.A. Ngjarja e rëndë ka tronditur komunitetin e Maliqit dhe për të cilën po hetohet shkaku i zjarrit.
