Kombet e Bashkuara raporton se 20 anëtarë të stafit të saj janë kapur nga rebelët Huthi në Sanaa, një ditë pas një bastisjeje në zyrat e OKB-së. Jean Alam, zëdhënës i koordinatorit të përhershëm të OKB-së në Yeman, tha se pesë anëtarë janë të punësuar vendas dhe 15 janë ndërkombëtarë, të cilët po mbahen në kompleksin e OKB-së. Ai njoftoi se 11 punonjës të tjerë vendas janë liruar pas marrjes në pyetje dhe theksoi se organizata është në kontakt me Huthit për të zgjidhur situatën.
Incidenti i fundit ndodh në një kohë kur rebelët Huthi kanë intensifikuar veprimet e tyre ndaj punonjësve të OKB-së. Më 31 gusht, forcat e Huthit kishin pushtuar zyrat e OKB-së, duke arrestuar rreth dhjetë punonjës, të cilët sipas një zyrtari Huthi dyshoheshin për spiunazh në favor të SHBA-së dhe Izraelit. Udhëheqësi rebel, Abdelmalek al-Houthi, deklaroi në një fjalim televiziv se grupi i tij kishte shkatërruar një “qelizë të rrezikshme spiunazhi” që lidhej me organizatat humanitare.
Stephane Dujarric, zëdhënësi i sekretarit të përgjithshëm të OKB-së, i quajti këto akuza si “të rrezikshme dhe të papranueshme”, duke vënë në dukje se ato rrezikojnë sigurinë e stafit dhe operacionet humanitare. Nën presionin e këtyre ngjarjeve, koordinatori humanitar i OKB-së për Jemenin u zhvendos nga Sanaa në Aden, ku ndodhet selia e përkohshme e qeverisë së njohur ndërkombëtarisht.
Kjo situatë e tensionuar është pjesë e krizës më të gjerë humanitare që po ndodh në Jemen, një vend i goditur rëndë nga dhjetë vjet luftë civile, që ka çuar në vuajtje të thella për popullsinë. Kombet e Bashkuara e kanë cilësuar Jemenin si një nga vendet më të varfra të Gadishullit Arabik dhe një nga krizat më të rënda humanitare në botë.
