Sam Rivers, basisti i grupit rok Limp Bizkit, ka ndërruar jetë në moshën 48 vjeçare. Laimin e kanë bërë të ditur anëtarët e grupit përmes një deklarate në Instagram, ku e përshkruan atë si “zemrën e grupit”. Njoftimi, i bërë publik të shtunën në mbrëmje më 18 tetor, thekson se Sam ishte më shumë se një basist; ai përshkruhet si “magji e pastër”, që përfaqësonte “pulsin poshtë çdo kënge” dhe “shpirti në tingull”. Grupi shprehet se ai ishte një “legjendë midis legjendave” dhe përfundon me një mesazh emocionues: “Udhëtim të mbarë, vëlla. Muzika jote nuk mbaron kurrë”. Ende nuk është zbuluar shkaku i vdekjes së tij.
Sam Rivers kishte kaluar një pjesë të rëndësishme të jetës së tij duke luajtur me bateristin John Otto, ku u takua me Fred Durst në fillim të viteve 1990 gjatë punës së tyre në Chick-fil-A. Ata formuan versionin origjinal të Limp Bizkit dhe më vonë u bashkua me kitaristin Wes Borland dhe DJ Lethal në vitin 1996. Gjatë tre dekadave të karrierës, përveç një ndalesë të përkohshme nga viti 2006 deri në vitin 2009, grupi ka realizuar turne në të gjithë botën dhe ka publikuar gjashtë albume. Mes tyre përfshihen tituj të vlerësuar nga kritika si “Significant Other” (1999) dhe “Chocolate Starfish and the Hot Dog Flavored Water” (2000).
Limp Bizkit është njohur për hite të njohura si “Rollin’ (Air Raid Vehicle)”, “Take A Look Around”, “My Way”, “Behind Blue Eyes”, “Nookie”, “Hot Dog” dhe “Break Stuff”, me këtë të fundit që është dëgjuar gati një miliard herë në Spotify. Në vitin 2015, Sam Rivers përjetoi një periudhë të vështirë shëndetësore duke u larguar përkohësisht nga grupi për shkak të sëmundjeve të mëlçisë që rezultonin nga konsumimi i tepërt të alkoolit. Pas një transplanti të mëlçisë, ai u rikthye në grup në vitin 2018, duke vazhduar të kontribuonte në muzikën e bendit deri në ndarjen e tij të parakohshme nga jeta.
