Komiteti Drejtues i Dhomës së Avokatisë të Shqipërisë ka zhvilluar një mbledhje pas arrestimit të avokatit Ulian Barjami. Në një deklaratë publike, Dhoma e Avokatisë njoftoi se do të bojkotojë të gjitha proceset penale nga data 20 deri më 25 tetor.
Vendimi i Komitetit përfshin bllokimin e të gjitha proceseve penale, duke përfshirë hetimet dhe gjykimet në të gjitha shkallët, përveç rasteve që lidhen me caktimin, ndryshimin, zëvendësimin dhe shuarjen e masave të sigurimit. Mospjesmarrja e avokateve në këto procese gjatë këtij periudhe do të jetë një arsye objektive për shtyrjen e gjykimeve.
Shkelja e këtij vendimi nga avokatët do të konsiderohet shkelje e rëndë disiplinore dhe do të rezultojë në procedime nga Komiteti i Disiplinës, duke përfshirë mundësinë e pezullimit ose heqjes së licencës për ushtrimin e profesionit.
Komiteti Drejtues kërkoi gjithashtu angazhimin urgjent të Inspektorit të Lartë të Drejtësisë, Këshillit të Lartë Gjyqësor dhe Këshillit të Lartë të Prokurorisë për shqyrtimin e kësaj çështje. Dhoma e Avokatisë do të depozitojë një kopje të vendimit pranë çdo gjykate në të gjitha nivelet, si dhe pranë institucioneve të sipërpërmendura.
Gjithashtu, është kërkuar që takimi i parashikuar me Ministrinë e Drejtësisë, për diskutimin e Projekt Kodit Penal, të shtyhet për një datë tjetër. Ky takim ishte planifikuar për 20 tetor dhe ishte organizuar nga Ministria e Drejtësisë.
Në këtë mënyrë, avokatët e Shqipërisë shprehin shqetësimin e tyre në lidhje me situatën aktuale dhe kërkojnë një vëmendje të veçantë për problemet që lidhen me profesionin e tyre.
