Qarkullimi i automjeteve në disa zona të Tiranës do të jetë i kufizuar sot për shkak të “Maratonës së Tiranës 2025”. Policia njofton se kufizimet do të mbeten në fuqi nga ora 08:00 deri në 16:00 në një sërë rrugësh dhe bulevarde. Në mesin e tyre përfshihen sheshi “Nënë Tereza”, bulevardi “Dëshmorët e Kombit”, rruga “Gjergj Filipi”, dhe bulevardi “Bajram Curri”, si dhe shumë rrugë të tjera që lidhen me itinerarin e maratonës.
Gjithashtu, gjatë këtij intervali, do të pezullohet itinerari i mjeteve të transportit urban në bulevardin “Dëshmorët e Kombit” dhe sheshin “Nënë Tereza”, si dhe në të gjitha segmentet rrugore që kryqëzohen me to. Kufizimi vlen për datën 19.10.2025 nga ora 08:00 deri në 16:00.
Ndalohet gjithashtu qarkullimi i automjeteve për transport të përzier dhe ato për transport pasagjerësh, përveç mjeteve të transportit urban, brenda Unazës së Madhe gjatë të njëjtës periudhë. Mjetet e Emergjencës dhe Policia e Shtetit do të kenë të drejtë të qarkullojnë normalisht në të gjitha itineraret e përmendura.
Policia e Tiranës ka bërë apel për qytetarët që të shmangin lëvizjen me mjete në zonat me kufizime dhe t’i përdorin rrugët alternative, duke respektuar udhëzimet e punonjësve të policisë në terren. Aktiviteti i “Maratonës së Tiranës” pritet të sjellë një numër të madh pjesëmarrësish dhe vizitorësh, për këtë arsye organizatorët dhe autoritetet po punojnë për të garantuar një mbarëvajtje të sigurt të këtij eventi sportiv.
