Maqedonia e Veriut organizon sot raundin e parë të zgjedhjeve lokale, ku qytetarët e saj do të zgjedhin drejtuesit e rinj për 81 komunat, përfshirë kryetarin e Komunës së Shkupit dhe anëtarët e këshillave komunalë. Votimi ka filluar në orën 07:00 dhe do të vazhdojë deri në orën 19:00, në 3,474 qendra votimi në të gjithë vendin, me 1,832,415 qytetarë të regjistruar për të votuar.
Në këtë proces zgjedhor, garojnë 22 parti politike, 19 koalicione dhe 119 grupe të pavarura, me gjithsej 309 kandidatë për kryetarë komunash dhe 576 lista për këshilltarë lokalë. Shkup është qyteti me konkurrencën më të lartë, ku 16 kandidatë garojnë për postin e kryetarit të komunës, duke e bërë këtë zgjedhje një nga më të ndjekurat.
Për të siguruar një proces të transparencës dhe demokratik, zgjedhjet po monitorohen nga 1,451 vëzhgues, përfshirë 807 vendorë dhe 644 ndërkombëtarë. Vëzhguesit janë të shpërndarë në të gjitha qendrat e votimit dhe po mbikëqyrin çdo fazë të procesit, duke nisur nga hapja e qendrave deri në numërimin e votave.
Këto zgjedhje vijnë në një moment të rëndësishëm për Maqedoninë e Veriut, në një atmosferë politike të ngarkuar. Rezultatet e këtyre zgjedhjeve pritet të ndikojnë jo vetëm në nivel lokal, por gjithashtu në pozicionimin e forcave politike përballë sfidave që do të ballafaqohen në të ardhmen, në arenën kombëtare dhe ndërkombëtare.
