Policia e Komisariatit Nr. 6 përfundoi operacionin e koduar “Confirmation”, duke arrestuar në flagrancë një të ri 22-vjeçar në Kombinat. Ai u kap duke qarkulluar me një armë zjarri pistoletë në automjetin e tij.
Në kuadër të luftës kundër armëmbajtjes pa leje, shërbimet policore morën informacion për një shtetas që kishte armë në zonën e Kombinatit. Pas organizimit të një operacioni, policia ndaloi automjetin në rrugën “Ilia Papanikolla”. Gjatë kontrollit, u gjet një pistoletë e fshehur në sediljen e makinës.
I arrestuari u identifikua si E. B., 22 vjeç, banues në Tiranë. Së bashku me armën e zjarrit, u sekuestrua edhe automjeti në pronësi të tij. Materialet e operacionit i janë referuar Prokurorisë për veprime të mëtejshme ligjore.
