Në përpjekje për të rritur standardet e muzeve në Gjirokastër dhe për t’i shërbyer më mirë vizitorëve, institucionet kulturore po pasurojnë fondet e tyre me relike të reja. Së fundi, Muzeu Etnografik ka rikthyer veshje popullore nga kjo krahinë, të cilat risjellin dhe rijetësojnë vlerat e traditës shqiptare.
Kostumet janë realizuar me mjeshtëri dhe elegancë nga artizanët lokalë, duke ofruar një pamje tërheqëse për turistët. Mjeshtrja e qëndistarisë, Lizeta Hatika, thekson se të gjitha kostumet janë të plota, me pjesët përbërëse dhe me certifikim për secilin, si dhe një histori dhe datë të saktë për vendin dhe kontekstin etnografik ku janë përdorur. Ky informacion është i disponueshëm edhe në gjuhën angleze, për të lehtësuar vizitën e turistëve.
Rikthimi dhe pasurimi i vazhdueshëm i muzeve në Gjirokastër ka rritur interesin e vizitorëve, veçanërisht të të huajve, për të mësuar rreth historisë dhe traditës së kësaj zone. Florian Hysi nga Agjencia e Trashëgimisë Kulturore shprehet për një angazhim të vazhdueshëm për përfaqësimin e çdo zone të Gjirokastrës me këto veshje dhe vlera të tjera në shërbim të vizitorëve.
Në Gjirokastër operojnë disa muzeume të rëndësishme, përfshirë Muzeun Etnografik, Muzeun e Armëve dhe Shtëpinë “Kadare”, të cilat kanë marrë një rol kyç në nxitjen dhe zhvillimin e turizmit. Këto institucione kulturore kontribuojnë në rritjen e njohjes dhe vlerësimit të trashëgimisë kulturore në këtë qytet historik, duke i ofruar një përvojë të pasur vizitorëve që eksplorojnë thesaret e tij.
