Mbreti Charles dhe Mbretëresha Camilla do të realizojnë një vizitë zyrtare në Vatikan javën e ardhshme, ku Mbreti do të jetë për herë të parë pas pesë shekujsh që lutet publikisht me Papën, një ngjarje e rëndësishme për marrëdhëniet mes Kishës Katolike dhe Kishës së Anglisë, ku ai vepron si Guvernator Suprem.
Sipas Sky News, ceremonia do të përfshijë një shërbim ekumenik të veçantë në Kapelën Sistine, të fokusuar në forcimin e bashkëpunimit midis kishave të ndryshme të krishtera. Ky moment shënon një kthesë historike, duke qenë hera e parë që një monark anglez dhe Papa ndajnë një moment reflektimi që nga Reforma 500 vjet më parë.
Një tjetër ngjarje historike do të jetë emërimi i Mbretit Charles si “Vëllai Mbretëror” i Kishës së Shën Palit Jashtë Mureve. Vatikani ka njoftuar se Papa do t’i dhurojë këtij titulli në shenjë të vëllazërisë shpirtërore. Për këtë rast, do të krijohet një vend i veçantë i dekoruar me stemën mbretërore, që Charles do ta përdorë gjatë ceremonisë. Pas shërbimit, ky vend do të ruhet në shenjtëroren e Bazilikës për përdorim të ardhshëm nga ai dhe pasardhësit e tij.
Bazilika e Shën Palit Jashtë Mureve ka një histori të rëndësishme për Kurorën Britanike, duke mbajtur lidhje të ngushta me mbretërit anglezë para Reformës. Sot, ajo është një vend që promovon pajtimin dhe ekumenizmin, duke u angazhuar për bashkëpunimin midis besimeve të krishtera. Kjo vizitë e Mbretit Charles dhe marrëveshjet e arritura pritet të forcojnë lidhjet historike dhe shpirtërore midis dy kishave.
