Një tjetër skandal trondit botën e ndërtimit dhe politikës në Tiranë: fitimet e basteve të paligjshme po lahen nëpërmjet ndërtimit të një pallati 28-katësh në zemër të Ali Demit, ku pas skemës qëndron Njuland (Lendi) Palaj, personazhi i njohur i dosjeve të policisë, dhe Tom Doshi, i cili shfaqet si bashkëinvestitor i heshtur në këtë projekt luksoz që do të ndërtohet mbi pastrim parash dhe varfërinë e qytetarëve.
Lendi Palaj, 28 vjeç, i njohur si “truri” i rrjetit të basteve të paligjshme “333” dhe “CR7”, është arrestuar disa herë nga policia për organizim bastesh sportive, mbajtje armësh dhe përfshirje në konflikte të armatosura, por si gjithmonë, drejtësia është treguar e butë ndaj tij. Sipas burimeve për “Timoni.al”, megjithëse ndaj tij janë ngritur akuza për veprimtari kriminale, Palaj ka dalë përsëri i lirë, duke vijuar aktivitetin e tij në hije dhe tashmë është në prag të një investimi marramendës: një kullë 28-katëshe në Ali Dem, që pritet të ndërtohet përmes një shoqërie ndërtimi të regjistruar së fundmi në emër të familjarëve dhe bashkëpunëtorëve të tij të ngushtë.
Burime pranë organeve tatimore dhe policore konfirmojnë se Palaj kryen evazion fiskal sistematik, fsheh të ardhurat reale dhe nuk deklaron pagat e punonjësve të tij në pikat e basteve dhe lokalet që kontrollon. Skema është e thjeshtë, por e sofistikuar: qarkullimi real i parave nga bastet ilegale kanalizohet përmes disa bizneseve fiktive që operojnë si bare apo “fast food”-e, ndërsa një pjesë e parave transferohet për ndërtimin e kullës me 28 kate në Ali Dem, ku pritet të përfshihet edhe kapital nga grupi ndërtimor që lidhet me Tom Doshin.
Hetimet e fundit të Policisë zbulojnë një rrjet të tërë personash që menaxhon bastet ilegale në Tiranë, ku Palaj ka qenë gjithmonë figura kyçe. Ai ishte arrestuar më herët gjatë një kontrolli në lokalin e tij në Xhamllik, në rrugën “Sadik Petrela”, ku policia gjeti prova të qarta për veprimtari bastesh sportive përmes celularëve dhe komunikimeve të koduara me klientët. Në pranga, krahas Palajt, ranë edhe Arsen Zebi, Florian Çela, Ergest Lloci dhe Erigest Alisha, të cilët merreshin me organizimin dhe shpërndarjen e fitimeve të basteve.
Megjithatë, ajo që trondit më shumë është fakti se paratë e fituara nga këto aktivitete kriminale po përdoren për të ngritur struktura shumëkatëshe në Tiranë, duke u larë përmes sistemit bankar me dokumente të falsifikuara dhe deklarata fiktive të “investimeve të huaja”. Ky model është i njëjtë me atë të përdorur në vitet e fundit nga disa persona të lidhur me rrjetet e lojërave të fatit që, pasi u mbyllën në 2019, vijuan aktivitetin në mënyrë të fshehtë nën mbulesën e lokaleve, lounge-ve dhe pikave të “fast cash”-it.
Një hetim i nisur nga strukturat e anti-pastrim parash tregon se emri i Lendi Palajt lidhet drejtpërdrejt me disa llogari të hapura në emër të të afërmve të tij në Kosovë dhe Maqedoninë e Veriut, përmes të cilave janë kryer disa transferta të dyshimta prej qindra mijëra eurosh. Këto shuma mendohet se po përdoren për të financuar ndërtimin e pallatit 28-katësh në Ali Dem — një zonë ku tokat janë blerë me çmime nën vlerë, duke u paguar pronarëve në dorë, pa gjurmë në banka.
Pyetja që lind është e qartë: pse një person si Lendi Palaj, me disa precedentë penalë, me arrestime për armëmbajtje pa leje dhe për përfshirje në baste ilegale, nuk është ende në burg? A janë strukturat e drejtësisë pjesë e zinxhirit të mbrojtjes që garanton pastrimin e miliona eurove përmes ndërtimit?
Në një shtet normal, një person i tillë do të ishte tashmë në pranga, nën hetim për pastrim parash dhe financim të aktiviteteve kriminale. Por në Shqipëri, aty ku krimi vishet me kostum dhe kthehet në investitor, Lendi Palaj po përgatitet të ndërtojë një kullë që do të shërbejë si monument i pastrimit të parave të basteve dhe dështimit të shtetit për të mbrojtur qytetarët.
Dëshmitarë në zonën e Ali Demit pohojnë se punimet për ndërtimin e kullës pritet të nisin brenda këtij viti, ndërsa kompania që do ta ndërtojë ka siguruar tashmë dokumentet për leje ndërtimi nëpërmjet ndërmjetësve të lidhur me ish-deputetin Tom Doshi. Kjo nuk është vetëm një aferë ndërtimore, por një sinjal i frikshëm se si paratë e pista po marrin formë betoni në Tiranë, përmes bashkëpunimit të biznesit të krimit me politikën.
Nëse prokuroria dhe SPAK nuk ndërhyjnë tani, ky projekt 28-katësh në Ali Dem do të jetë jo vetëm simboli i një ndërtese, por dëshmia më e qartë e faktit se bastet, krimi dhe politika ndërtojnë sot pallatet e së nesërmes në Shqipëri.
