Të enjten, Shqipëria do të përballet me kushte atmosferike relativisht të paqëndrueshme. Moti do të fillojë me kthjellime, veçanërisht në veri, por më vonë do të ketë një shtim të vranësirave mesatare deri të dendura.
Reshjet e shiut pritet të fillojnë në jug gjatë orëve të mëngjesit dhe do të përhapen gradualisht mbi pjesën më të madhe të territorit, me intensitet të ulët. Lokalisht, mund të ketë reshje shiu me intensitet deri mesatar dhe shtrëngata afatshkurtra, me ndërprerje.
Era do të fryjë kryesisht nga lindja, me shpejtësi mesatare prej 7 m/s. Në zonat luginore dhe përgjatë vijës bregdetare, shpejtësia e erës pritet të arrijë deri në 16 m/s.
Sa i përket detit, valëzimi në Adriatik dhe Jon do të ketë forcën 2-3 ballë.
