Presidenti sirian, Ahmed al-Sharaa, do të vizitojë Rusinë këtë të mërkurë për të takuar Presidentin Vladimir Putin. Kjo vizitë shënon herën e parë që Al-Sharaa, i cili drejtuesi i qeverisë kalimtare të Damaskut, merr pjesë në një takim zyrtar në Moskë, një aliat i njohur i ish-regjimit të Bashar al-Assadit, i cili u rrëzua në dhjetor.
Gjatë këtij takimi, Al-Sharaa dhe Putin do të diskutojnë mbi “zhvillimet rajonale dhe ndërkombëtare” dhe do të shqyrtojnë mundësitë për të forcuar bashkëpunimin, sipas informacionit nga agjencia shtetërore siriane SANA. Një zyrtar sirian ka konfirmuar se bisedimet do të përfshijnë dhe temën e pranisë ruse në bazën detare të Tartous dhe bazën ajrore në Khmeimim. Al-Sharaa planifikon gjithashtu të kërkojë dorëzimin zyrtar të Bashar al-Assadit, i cili jeton në mërgim në Moskë pas largimit të tij nga Siria.
Al-Sharaa, i njohur dikur si Abu Mohammed al-Julani, udhëhoqi forcat rebele që pushtuan Damaskun dhe krijuan një qeveri të re, duke shpërngulur al-Assadin pas dekadash sundimi. Pas këtij ndryshimi, Rusia ka kërkuar të forcojë marrëdhëniet me udhëheqjen e re siriane, duke ofruar mbështetje diplomatike për Damaskun, veçanërisht përballë sulmeve izraelite.
Në muajin shkurt, Putin kishte telefonuar Al-Sharaan për të shprehur mbështetje për “unitetin, sovranitetin dhe stabilitetin” e Sirisë. Po ashtu, në korrik, Putini dhe ministri i tij i Jashtëm, Sergey Lavrov, u takuan me Ministrin e Jashtëm sirian Asaad al-Shibani në Moskë.
Vizita e Al-Sharaa-s vjen pas një udhëtimi të tij në Nju Jork në shtator, ku ai përfaqësoi Sirinë në Asamblenë e Përgjithshme të Kombeve të Bashkuara, duke deklaruar se Siria po “rimerr vendin e saj të merituar midis kombeve”. Ai kërkoi gjithashtu heqjen e sanksioneve, duke theksuar se Siria është duke shkruar një kapitull të ri në historinë e saj, të titulluar “paqe, stabilitet dhe prosperitet”.
