Dy burra të dënuar me vdekje për vrasje janë ekzekutuar në Florida dhe Missouri. Këto ekzekutime me injeksion të kimikateve vdekjeprurëse e çojnë numrin total të ekzekutimeve në Shtetet e Bashkuara në 37 për këtë vit, numri më i lartë që nga viti 2013. Në këtë javë janë planifikuar gjithashtu dy ekzekutime të tjera, një në Misisipi dhe tjetra në Arizona, ndërsa deri në fund të vitit priten gjithsej tetë ekzekutime.
Në Florida, Samuel Smithers, 72 vjeç, u ekzekutua për vrasjen e dy prostitutave në vitin 1996. Viktimat e tij, Christy Cowan dhe Denise Roach, u rrahën dhe u mbytën, dhe trupat e tyre u gjetën në një pronë ku ai punonte si kopshtar.
Ndërkohë, në Missouri, Lance Shockley, 48 vjeç, u ekzekutua për vrasjen e oficerit të policisë Carl Graham në vitin 2005. Shockley, i cili gjithmonë këmbënguli se ishte i pafajshëm, u dënua pavarësisht mungesës së provave të forta dhe faktit që juria nuk arriti në një vendim unanim për dënimin. Missouri është një nga pak shtetet ku dënimi me vdekje mund të vendoset edhe pa një vendim unanim nga juria.
Nga 37 ekzekutimet e këtij viti, 31 janë kryer përmes injeksionit vdekjeprurës, ndërsa katër janë realizuar me anë të asfiksisë përmes thithjes së azotit, një metodë e diskutueshme që përballet me kritika dhe është përdorur për herë të parë në Alabama në 2004. Dy ekzekutime të tjera janë kryer përmes skuadrave të pushkatimit në Karolinën e Jugut, metodë që nuk ishte përdorur që prej 2010.
Dënimi me vdekje është hequr në 23 nga 50 shtetet amerikane, me tre të tjera – Kalifornia, Oregoni, dhe Pensilvania – që po zbatojnë moratorium për zbatimin e tij sipas vendimeve të guvernatorëve të tyre.
