Prokuroria e Tiranës ka zbardhur dinamikën e vrasjes së gjyqtarit Astrit Kalaja, i cili u qëllua me armë zjarri brenda sallës së gjyqit në Gjykatën e Apelit më 6 tetor 2025. Ngjarja ndodhi rreth orës 15:35, gjatë një seance gjyqësore që kishte si objekt “Kundërshtimin e veprimeve përmbarimore”.
Në sallën nr. 3 ishin të pranishëm Gjon Shkambi, nipi i tij Elvis Shkambi, si dhe Ragip e Ervis Kurtaj, të gjithë të angazhuar në çështjen që po shqyrtohej nga gjyqtari Kalaja. Pas shpalljes së vendimit, Elvis Shkambi nxori një pistoletë nga brezi dhe qëlloi disa herë drejt gjyqtarit, i cili ra përtokë si rezultat i goditjeve.
Pas veprimit të tij, ai i drejtoi armën edhe Ragip e Ervis Kurtaj, të cilët tentuan të iknin nga salla. Shkambi qëlloi me armë drejt tyre, duke shkaktuar panik. Më pas, ai i dorëzoi armën punonjësit të sigurisë së gjykatës dhe u largua në oborr, ku u arrestua nga shërbimet e Komisariatit të Policisë Nr.1 në Tiranë.
Policia ka sekuestruar armën e krimit, një pistoletë me mbishkrimin “Welt Waffen W. Germany, Cal.765 mm, Browning”, e cila kishte një fishek në folenë e zjarrit dhe dy të tjerë në krehër. Gjithashtu, në parkingun pranë Xhamisë së Namazgjasë, u gjet automjeti “Mercedes-Benz” në pronësi të Gjon Shkambit, ku u zbuluan 31 fishekë manovër kalibri 9 mm.
Elvis Shkambi përballet me akuzat për “vrasje e funksionarëve publikë”, “vrasje në rrethana të tjera cilësuese” dhe “mbajtje pa leje e armëve”. Hetimet vazhdojnë për të zbardhur të gjitha detajet e ngjarjes tragjike.
