Presidenti ukrainas, Volodymyr Zelensky, u bëri thirrje liderëve globalë që të mbajnë vrullin për avancimin e paqes, duke e lidhur këtë me sukseset e fundit në Lindjen e Mesme, veçanërisht marrëveshjen e armëpushimit në Gaza. Ai deklaroi se “lufta në Evropë gjithashtu mund të marrë fund”, duke theksuar rëndësinë e rolit dhe lidershipit të Shteteve të Bashkuara, për të ndalur agresionin rus ndaj Ukrainës.
Në një postim në platformën X, Zelensky informoi se realizoi një bisedë me presidentin finlandez, Alexander Stubb, gjatë së cilës u diskutua për harmonizimin e qëndrimeve për paqen dhe forcimin e mbrojtjes ajrore të Ukrainës. Ai theksoi se me përfundimin e luftës në Lindjen e Mesme, është thelbësore të mos humbet mundësia për të avancuar paqen në Evropë.
Zelensky i përgëzoi Shtetet e Bashkuara për përpjekjet e presidentit Donald Trump në sigurimin e lirimit të pengjeve dhe për ndalimin e luftës në Gaza, duke nënvizuar se veprimet e duhura nga SHBA-të mund të kontribuojnë ndjeshëm edhe në përfundimin e agresionit rus. Ai gjithashtu diskutoi për sulmet e fundit ruse ndaj infrastrukturës energjetike të Ukrainës dhe theksoi nevojën për forcimin e sistemit të mbrojtjes ajrore.
Zelensky falënderoi Finlandën për gatishmërinë për të ndihmuar Ukrainën dhe përfundoi duke thënë se “Rusisë duhet t’i hiqen mjetet për të vazhduar luftën dhe terrorin e saj”, si një bazë e fortë për paqen në rajonin e Evropës Lindore.
