Fitorja e Kosovës ndaj Suedisë ka pasur pasoja të rëndësishme për Serbinë në garën për Botërorin 2026. Sipas platformës “Football Meets Data”, ky rezultat ka reduktuar ndjeshëm mundësitë e Serbisë për të arritur në fazën “play off” të Kupës së Botës përmes Ligës së Kombeve. Shanset për t’u kualifikuar përmes kësaj rrugë tani janë vetëm 0.2%, që e bën praktikisht të pamundur këtë opsion.
Serbia tani duhet të mbyllë grupin e saj në vendin e dytë për të pasur mundësi që të garojë në “play off”, por nga të dhënat del se ka vetëm 21% shanse për ta arritur këtë. Ndërkohe, në renditjen e fundit, ekipi serb është përjashtuar nga mundësia e përdorimit të biletës së Ligës së Kombeve, ndërsa ekipe si Spanja, Gjermania, Portugalia, Franca, Anglia, Suedia dhe Rumania janë gati të sigurt në këtë drejtim.
Kjo situatë vjen pas një humbjeje tjetër për Serbinë, pasi kishte pësuar një disfatë ndaj Shqipërisë. Tashmë, Kosova është kthyer në një faktor domethënës për Serbinë, duke e bërë atë një “makth” të vërtetë gjatë kësaj fushate kualifikuese. Rreziku i eliminimit nga gara për Botërorin është bërë evident, dhe ekipi serb ndodhet në një pozita delikate që kërkon një përmirësim të shpejtë në renditjen e grupit për t’i dhënë vetes një mundësi për të vazhduar ëndrrën për në Botëror.
