Greqia përjeton sërish një grevë të përgjithshme 24-orëshe, e dyta brenda dy javëve, si reagim ndaj projektligjit të ri të punës. Ky ligj, i cili parashikon mundësinë e punës deri në 13 orë në ditë tek i njëjti punëdhënës, ka provokuar protesta masive.
Grevës i janë bashkuar 38 Qendra të Punës dhe organizata të rëndësishme si ADEDY, federata e punonjësve të sektorit publik, së bashku me dhjetëra sindikata të sektorit privat. Protestuesit kërkojnë që drafti të mos miratohet në parlament dhe të rikthehet puna 35-orëshe, javë 5-ditore, si dhe pagat e 13-ta e 14-ta. Ata gjithashtu bëjnë thirrje për kushte të sigurta pune dhe paga dinjitoze, ndërsa punonjësit e sektorit publik protestojnë kundër një disipline të re ligjore që u vendos gjithashtu.
Ajo që e bën këtë protestë edhe më të spikatur është deklarata e ADEDY, e cila akuzon qeverinë se, në vend të mbështetjes për punëtorët, zgjedh të miratojë një ligj që rrezikon të imponojë orar të rëndë pune. Sindikata PAME, e lidhur me Partinë Komuniste, e cilëson projektligjin si një përpjekje për të krijuar “skllevër modernë”. Kjo organizatë kërkon rritje reale të pagave nëpërmjet marrëveshjeve kolektive.
Studentët dhe nxënësit gjithashtu janë bashkuar në protestë, kundërshtojnë atë që e përshkruajnë si “ritmin çnjerëzor të punës së prindërve të tyre” dhe shtimin e presionit në shkolla. Protesta zhvillohen në shumë qytete, përfshirë Athinën, ku sindikatat kanë ftuar qytetarët të mblidhen në Sheshin Syntagma. Në Selanik, protesta kryesore mbahet pranë përmendores së Venizelos.
Grevëka e sotme ka shkaktuar pengesa të mëdha në transportin publik, shkolla dhe shërbime publike, për shkak të pjesëmarrjes të gjerë në grevë. Protestat pritet të zgjaten gjatë gjithë ditës, duke e bërë kështu situatën të tensionuar në mbarë vendin.
