Sipas një studimi të Institutit të Ekonomisë Gjermane (IW), një në shtatë shpikje në Gjermani vjen nga individë me prejardhje emigrantësh. Regjistrimet e patentave nga këta njerëz kanë parë një rritje të konsiderueshme, duke arritur në 14% për vitin 2022, nga 4.9% që ishin në vitin 2000. Kjo tregon rëndësinë në rritje të emigrantëve për ekonominë gjermane.
Studimi i IW ka analizuar shpikësit nga viti 2000, duke i grupuar sipas 24 zonave gjuhësore për të përcaktuar origjinën e tyre. Sipas këtyre të dhënave, kontribuesit kryesorë në regjistrimet e patentave janë ata nga Evropa Lindore dhe Juglindore, me një pjesëmarrje prej rreth 3%, ndjekur nga Evropës Jugore dhe Amerikës Latine. Hapësira arabe, përfshirë Turqinë, merr vendin e tretë me rreth 2%, me rritje të katërfishuar që nga viti 2000, ndërsa regjistrimet e patentave nga individë me origjinë indiane janë rritur dymbëdhjetëfish.
Për të përmirësuar këtë situatë dhe për të rritur imigrimin e profesionistëve të arsimuar, IW thekson nevojën për procedura të shpejta dhe jo burokratike për hyrjen në Gjermani dhe për njohjen e kualifikimeve. Alexandar Köbler, një studiues në IW, vëren se Gjermania duhet të ofrojë një ambient më të hapur për të tërhequr ekspertët ndërkombëtarë dhe për të mbetur e tërheqëse për talentet e huaja. Gjermania renditet si vendi i dytë në botë për numrin e patentave të regjistruara, pas Shteteve të Bashkuara, me rreth 25,000 patenta të regjistruara në vitin e kaluar.
Një tjetër informacion i rëndësishëm nga studimi është se përqindja e shpikëseve femra midis emigrantëve arrin pothuajse 9%, dyfish më shumë se ajo e gjermanëve. Përqindja më e madhe e femrave të shpikësve është e evidentuar veçanërisht në zonat gjuhësore të Evropës Lindore. Kjo sipas IW, mbështet tezën e paradoksit të barazisë gjinore, ku gratë në vende me nivele më të larta të mirëqenies shmangen shpesh prej profesionove teknike.
Në përgjithësi, përqindja e shpikëseve femra në të gjithë patentat e regjistruara në Gjermani është rritur nga 3.7% në vitin 2000 në 6.0% sot, duke dëshmuar se migrimi po sjell një ndikim pozitiv në sektorin e inovacionit në Gjermani.
