Një ditë pas zbatimit të fazës së parë të marrëveshjes së armëpushimit, që solli rikthimin e 20 pengjeve izraelitë dhe qindra të burgosurve te familjet, situata në Gazë mbetet e pasigurt. Ndërsa disa të afërm festojnë rikthimin e të dashurve, familjarët e atyre që kanë humbur jetën shprehin zemërim për faktin se vetëm 4 nga 28 kufomat u dorëzuan gjatë shkëmbimit. Mediat izraelite raportojnë se Hamasi dhe grupet e tjera palestineze mund të mos jenë në gjendje t’i gjejnë të gjitha eshtrat brenda afatit të caktuar.
Testet mjeko-ligjore kanë filluar për identifikimin e të katër trupave të rikthyera nga Hamasi. Familjet e disa pengjeve të ndjerë e akuzojnë qeverinë izraelite për tradhti për mos marrjen e masave të mjaftueshme për t’i sjellë ata në shtëpi, duke u ofruar një varrim të denjë. Ndërkohë, ata që janë liruar rapportojnë për një trajtim të dhunshëm dhe tortura, ndërsa një burrë raportohet se ishte mbajtur i izoluar për dy vjet.
Nga ana e tij, Hamasi ka vazhduar të forcojë autoritetin e tij në Gaza, me video që tregojnë ekzekutime të individëve të akuzuar për bashkëpunim me Izraelin. Një numër i madh palestinezësh, të liruar pas mbajtjes në burg pa akuza, gjithashtu pretendojnë se kanë përjetuar keqtrajtime.
Pas nënshkrimit të planit të paqes në Egjipt, Presidenti amerikan Donald Trump u largua nga rajoni, por detajet e rëndësishme të marrëveshjes ende kërkojnë negociata, për të shmangur një shpërthim të mëtejshëm të konfliktit. Megjithëse Trump shprehu optimizëm duke e quajtur këtë një “ditë të jashtëzakonshme” për Lindjen e Mesme, mbetet e paqartë nëse plani i tij do të çojë në një paqe të qëndrueshme dhe si do të realizohet ky objektiv në praktikë.
