Ka ndërruar jetë Arjan Kraja, hero i njohur për shpëtimin e dy fëmijëve nga mbytja në Velipojë. Ai kishte qenë në koma për tre muaj si pasojë e një ishemie pas këtij akti heroik.
Kraja ishte punonjës i Operatorit të Sistemit të Shpërndarjes (OSSH), dhe lajmi për vdekjen e tij ka tronditur komunitetin, si dhe kolegët e tij. OSSH ka reaguar me një deklaratë, duke shprehur keqardhjen e thellë për humbjen e Arjanit, i cili ishte shef grupi dhe ishte njohur për përkushtimin e tij profesional dhe ndershmërinë në punë. Ai ishte i dashur dhe i respektuar nga të gjithë për mirësinë e tij njerëzore.
Në këto momente të vështira, OSSH ofron ngushëllimet më të sinqerta për familjen, të afërmit dhe miqtë e Arjanit. Vdekja e tij është një humbje e madhe për të gjithë ata që e kanë njohur dhe vlerësuar.
