Zbulohet ‘foleja’ e prostitucionit në Durrës
Policia e Durrësit ka finalizuar operacionin e koduar “Storm 9”, duke zbuluar një rrjet prostitucioni që trafikonte vajza nga Kolumbia. Në këtë operacion, u arrestua organizatori, një shtetas kolumbian, dhe dy punonjëse seksi gjithashtu kolumbiane.
Prokuroria ka nisur procedime penale ndaj pronarit të apartamentit ku ushtrohej prostitucioni, për akuzat e “Fshehjes së të ardhurave” dhe “Moskallëzimit të krimit”. Po ashtu, janë proceduar në përgjegjësi penale dhe tre shtetas për veprën penale “Prostitucioni”.
Gjatë hetimeve, të cilat zgjatën tre javë, policia ka sekuestruar një sasi kanabisi, një shumë parash të dyshuar të përfituara nga prostitucioni, pesë celularë dhe pasaportat e dy shtetaseve të arrestuara. Hetimet u zhvilluan në bashkëpunim me Seksionin për Hetimin e Trafiqeve, ku u identifikua dhe u shpall në kërkim shtetasi D. G., 28 vjeç, banues në Kolumbi, nën akuzat për “Trafikimi i personave të rritur” dhe “Shfrytëzimi i prostitucionit”.
Shtetaset M. A. dhe Y. C., të dyja 24 vjeçare dhe banuese gjithashtu në Kolumbi, u arrestuan në flagrancë për akuze të ngjashme, si dhe për “Prodhimi dhe shitja e lëndëve narkotike”. Apartamenti ku ato qëndronin ishte përshtatur për ushtrimin e aktivitetit të paligjshëm në lagjen nr. 18 të Durrësit.
Hetimet e zhvilluara kanë zbuluar se shtetasi kolumbian ka mbajtur nën kontroll transportin e shtetasve kolumbianë në Shqipëri për t’i shfrytëzuar ata për prostitucion. Gjatë kontrollit të apartamentit, u gjet edhe një sasi lënde narkotike cannabis sativa.
Policia vazhdon kërkimin për arrestimin e D. G. dhe punën për dokumentimin e plotë të veprimtarisë kriminale. Materialet procedurale janë referuar Prokurorisë pranë Gjykatës së Shkallës së Parë në Durrës për veprime të mëtejshme.
