Christian Horner mund të rikthehet shpejt në Formula 1, pasi po zhvillon bisedime me Ferrarin për të marrë drejtimin e skuadrës me më shumë suksese në historinë e sportit. Sipas Daily Mail, 51-vjeçari që u shkarkua nga pozita e shefit të Red Bull pas dështimit në Çmimin e Madh të Britanisë, përfundoi një epokë 20-vjeçare që solli 14 tituj botërorë, përfshirë gjashtë në kampionatin e konstruktorëve dhe tetë në atë të pilotëve.
Pas largimit, Horner mori një dëmshpërblim prej 80 milionë paundësh, por ndërkohë shfaqet i interesuar të rikthehet në paddock-un e Formula 1. Andy Cowell, drejtuesi i Aston Martin, duke aluduar për angazhimet e Hornerit, tha me humor se ai po telefonon shumë pronarë skuadrash.
Raportet mediatike britanike sugjerojnë se presidenti i Ferrarit, John Elkann, ka humbur besimin në drejtuesin aktual, Fred Vasseur, ndonëse ky i fundit ka kontribuar në transferimin e Lewis Hamilton nga Mercedes. Me Hamiltonin që nuk ka arritur ende asnjë podium dhe Charles Leclerc që përballet me performanca të paqëndrueshme, situata në Ferrari kërkon një ndryshim.
Ferrari nuk ka fituar titullin për pilotë që nga viti 2007, kur Kimi Raikkonen e fitoi atë, dhe titulli i fundit i konstruktorëve erdhi në 2008. Suksesi i Hornerit në ndërtimin e një skuadre dominuese si Red Bull e bën atë një kandidat të lakmuar për një pozicion në Ferrari.
Nëse marrëveshja me Ferrarin finalizohet, ajo do të jetë një nga lëvizjet më të bujshme në historinë moderne të sportit motorik.
