Nga Av. Arben Llangozi
Brunilda Mersini, e cila tashmë është shpallur kandidate për Bashkinë e Vlorës, përbën një ndër rastet më skandaloze të kapjes së politikës nga krimi i organizuar. Burime të shumta pohojnë se ajo është vendosur në këtë garë me porosi direkte nga rrjete kriminale që prej vitesh kontrollojnë ekonominë e jugut dhe veçanërisht zonat bregdetare.
Profili familjar i saj është thellësisht komprometues dhe tregon qartë lidhje të ngushta me individë të dënuar për vepra të rënda penale, që nga trafiku ndërkombëtar i drogës, organizatat mafioze dhe deri te pastrimi i produkteve të veprës penale. Ajo është motra e shtetasit Alxhi Nallbani, i njohur në botën e krimit si “Xhili”, i cili është dënuar me 14 vjet burgim në shtetin italian për pjesëmarrje në organizatë mafioze dhe trafik të lëndëve narkotike.
Një tjetër lidhje alarmante është ajo me Renardo Nallbanin, i njohur si “Nardi”, kushëri i afërt, i dënuar po ashtu për organizatë kriminale dhe trafik droge me një vendim të formës së prerë prej 14 vjetësh burg. Aktualisht, sipas të dhënave të disponueshme, ai ndodhet nën masë sigurie “arrest në burg” për përfshirjen në aferën e inceneratorëve një nga skandalet më të mëdha financiare të tranzicionit shqiptar.
Por pjesa më tronditëse e këtij mozaiku kriminal është lidhja gjaku që Brunilda Mersini ka me figurën e njohur të botës së krimit, Alfred Shkurti, i njohur si Aldo Bare një nga bosët më të rrezikshëm të mafies shqiptare, i dënuar për krime të shumta, përfshirë vrasje dhe drejtim organizate kriminale. Ajo është vajza e dajës së tij, çka e vendos në qendër të një rrjeti të trashëguar të lidhjeve të errëta mes politikës dhe botës së krimit.
Në vend që të ishte subjekt hetimi për pastrim parash dhe lidhje me individë me precedent penal, ajo promovohet si përfaqësuese politike dhe më tej si kandidate për njërën prej bashkive më strategjike të vendit Vlorën, portën kryesore të jugut dhe nyjën më të rëndësishme për investime, turizëm dhe pasuri publike.
Kjo kandidaturë shihet si një lëvizje e koordinuar e grupeve të krimit të organizuar, të cilat përmes saj synojnë të konsolidojnë kontrollin mbi pasuritë bregdetare, tokat e vyera në Tragjas, Orikum dhe zonën e Zvërnecit, duke i kthyer këto territore në një “koloni kriminale” ku politika është thjesht fasadë dhe vendimmarrjet merren në prapaskenë.
Në qarqet investigative flitet se i gjithë procesi i tranzicionit të pronave në Tragjas, si dhe disa projekte të reja ndërtimore në zonën e Rradhimës dhe Ujit të Ftohtë, janë të lidhura drejtpërdrejt me strukturat që mbështesin politikisht Brunilda Mersinin.
Në thelb, rasti i saj tregon më qartë se kurrë më parë se si krimi i organizuar jo vetëm ka depërtuar në politikë, por tashmë po e përdor atë si mjet për legjitimim, pastrim dhe kontroll të territorit.
Nëse institucioneve të drejtësisë u mbetet vetëm roli i spektatorit, atëherë kandidatura e Brunilda Mersinit nuk është thjesht një skandal elektoral, por një provë e qartë e kapjes përfundimtare të pushtetit vendor nga struktura kriminale.
