EGJIPT- Presidenti amerikan, Donald Trump nënshkruajti planin e paqes për Gazën në samitin në Sharm el-Sheikh. Dokumenti për paqen në Gaza u nënshkrua live nga Trump dhe liderët e tjerë. Kreu i Shtëpisë së Bardhë, pasi e nënshkroi, tha u deshën 3,000 vite për të arritur në këtë pikë.
Trump falenderon edhe liderët e tjerë për mbështetjen e treguar gjatë negociatave për armëpushimin. Trump deklaroi se më parë kishte pasur parashikime që pretendonin se Lufta e Tretë Botërore do të fillonte në Lindjen e Mesme, duke shtuar se kjo nuk do të ndodhë.
“Siç mund ta shihni, ky është ndoshta takimi më i madh i vendeve për sa i përket pasurisë dhe pushtetit që ka ndodhur ndonjëherë, dhe është një nder i madh të jem pjesë e tij. Kjo zgjati 3,000 vjet, a mund ta besoni? Dhe do të zgjasë. Kjo është një ditë e jashtëzakonshme për botën.
Marrëveshja është aq e madhe sa do të parandalojë një Luftë të Tretë Botërore – e cila mund të kishte shpërthyer në Lindjen e Mesme. Mendova se kjo do të ishte ndoshta më e vështira, dhe ndoshta në shumë mënyra ishte, por ne kishim shumë talente të shkëlqyera. Ne kishim një gamë të mahnitshme talentesh dhe u ndihmuam, në veçanti, nga vendet e përfaqësuara në këtë tryezë”, tha Trump.
Në këtë samit janë të pranishëm Presidenti i Autoritetit Palestinez, Mahmoud Abbas dhe udhëheqësit evropianë Emmanuel Macron i Francës, Giorgia Meloni Kryeministrja e Italisë, Kryeministri britanik Keir Starmer, Kancelari gjerman Friedrich Merz dhe kryeministri hungarez Victor Orban e shumë të tjerë. Mbreti i Bahreinit Hamad bin Isa Al Khalifa ishte gjithashtu në skenë. Ajo që ra në sy ishte edhe prania e shefit i FIFA-s, Gianni Infantino.
Por nga Izraeli nuk pati asnjë përfaqësues. Më herët, gjatë pritjes nga Presidenti egjiptian pas mbërritjes në Sharm el-Sheikh, Trump deklaroi se marrëveshja e Gazës nuk do të ishte arritur nëse SHBA nuk do të kishte goditur bazat bërthamore të Iranit./Dosja.al
