Festivalin e Trentos u mbush me emocion dhe nostalgji, kur legjenda e futbollit, Michel Platini, ndau kujtimet e tij me tifozët. Në auditorin “Santa Chiara”, Platini, i njohur si “Le Roi” dhe tre herë fitues i Topit të Artë, foli me sinqeritet për karrierën e tij dhe lidhjen me Juventusin, duke theksuar se qëllimi i tij ishte të argëtonte të gjithë tifozët, pa rëndësi se për cilin ekip ishin ata.
Platini ndau histori nga transferimi i tij nga Interi te Juventus, duke zbulur se kjo ndodhi për shkak të kufizimeve për lojtarët e huaj. Ai tregoi një moment komik, kur Boniperti e pyeti nëse do të fliste me “avokatin”, duke presupozuar se fliste për të tijin, kur në fakt nënkuptonte Agnelli-n. Ai përmendi ambiciet e klubit për të fituar Ligën e Kampionëve dhe besimin e tij për t’i ndihmuar qëllimeve të këtij klubi.
Kur filloi te Juventus në vitin 1982, Platini e pranoi se fillimi ishte i vështirë, por më pas ai dhe Boniek u shndërruan në një çift të shkëlqyer në fushë. Ai ruan kujtime të ngrohta për Boniek, duke theksuar rëndësinë e ndihmës reciproke në lojë.
Platini u tërhoq në moshën 32-vjeçare, duke treguar se ishte lodhur si fizikisht ashtu edhe mendërisht, sidomos pas tragjedisë në Bruksel. Ai shprehu shqetësimin për futbollin modern, veçanërisht për mungesën e mesfushorëve kreativë dhe rolin gjithnjë e më të kufizuar të lojtarëve.
Platini kritikoi gjithashtu sistemin VAR dhe skandalin e FIFA-s që i pengoi karrierën si drejtues. Ai shprehu dëshirën për një futboll më njerëzor, duke sugjeruar se nëse do të ishte president i FIFA-s, VAR do të hiqej.
Në fund, kur u pyet nëse do të rikthehej te Juventus si trajner apo drejtues, ai theksoi se nuk mund të ripërsëriteshin historitë e dashurisë dhe do të preferonte të kontribuonte për të mirën e futbollit. Me qindra autografe dhe një buzëqeshje, Platini dëshmoi se, edhe jashtë fushës, ai mbetet një kampion.
